Академияи сайёҳии Шоҳигарии Арабистони Саудӣ тибқи шартномаи ҳамкорӣ ҳамасола имкон дорад, ки чор бурсия барои донишҷӯёни Донишгоҳи байналмилалии сайёҳӣ ва соҳибкории Тоҷикистон ҷудо намуда, ҳудуди 30 нафар муҳассилинро ба таҷрибаомӯзӣ фаро гирад. 

Ин матлабро Халид ал-Сувалайҳ, намояндаи Академияи сайёҳии Шоҳигарии Арабистони Саудӣ, зимни мулоқот бо Убайдулло Асрорзода, ректори Донишгоҳи байналмилалии сайёҳӣ ва соҳибкории Тоҷикистон иброз дошт.

Тавре аз Донишгоҳ иттилоъ доданд, 15 июни соли равон сафири фавқулода ва мухтори Ҷумҳурии Тоҷикистон дар Арабистони Саудӣ Акрам Каримӣ ва намояндаи Академияи сайёҳии Арабистони Саудӣ Халид ал-Сувалайҳ аз Донишгоҳи байналмилалии сайёҳӣ ва соҳибкории Тоҷикистон дидан намуданд.

Зимни мулоқот ҷонибҳо масоили мубрами омодасозии муштараки кадрҳо, ташкили такмили ихтисос ва бозомӯзии омӯзгорон, табодули академии донишҷӯён, таҷрибаомӯзии донишҷӯён дар тарабхонаҳои бонуфузи Арабистони Саудӣ бо таъмини идрорпулии муайян ва таъмини шароити мусоиди будубошро баррасӣ намуданд. Ҳамзамон, тарафҳо ҷиҳати бастани шартномаҳои ҳамкорӣ доир ба масоили болозикр ба мувофиқа расиданд.

Меҳмонон бо шароити муосири омодасозии кадрҳои соҳаи сайёҳӣ ва меҳмондорӣ ошноӣ пайдо намуда, ба пойгоҳи моддӣ-техникии Донишгоҳи мазкур баҳои баланд доданд.

 

Комрон САФАР,  «Ҷумҳурият»