Маркази дипломатияи халқии Созмони ҳамкории Шанхай дар муддати чаҳор соли арзи вуҷудаш чандин чорабинии фарҳангӣ, экологӣ ва варзиширо ба роҳ мондааст, ки ҳадаф таҳкими риштаҳои дӯстӣ миёни мардумони ҳавзаи Созмон мебошад.

Ин нуктаро Қобилҷон Собиров, роҳбари Маркази дипломатияи халқии СҲШ, ки дафтараш дар шаҳри Тошканд аст, дар суҳбат бо “Ҷумҳурият” баён намуд. 

- Соли гузашта барои ширкат дар маросими ифтитоҳи Маркази дӯстӣ ва ҳамкории СҲШ дар Тоҷикистон ба шаҳри Душанбе даъват шудам. Дар ин маросим Дабири кулли вақти СҲШ Владимир Норов ва ёрдамчии Президенти Ҷумҳурии Тоҷикистон оид ба масъалаҳои робитаҳои хориҷӣ Азамшо Шарифӣ ширкат намуданд. Ҳоло ин марказ мисли маркази мо фаъолиятҳояшро дар заминаи дипломатияи халқӣ хеле пурсамар идома медиҳад. Албатта, таҷрибае, ки мо дар тули чаҳор сол ҳосил намудаем, барои дӯстони тоҷикамон низ тавъам мебошанд. Марказҳои дӯстӣ ва ҳамкории СҲШ ба сифати як ниҳоди ҳамоҳангсози самтҳои фаъолияти ин Созмони бонуфуз ташкил шудаанд, - гуфт Қобилҷон Собиров.

Номбурда изҳори бовар намуд, ки Ҷаласаи Шурои сарварони давлатҳои СҲШ, ки 15 – 16 сентябри соли равон таҳти раёсати Ӯзбекистон дар шаҳри Самарқанд баргузор мегардад, иттиҳоду ҳамбастагиро дар меҳвари гуфтугӯҳо қарор хоҳад дод. Шаҳри Самарқанд ба сифати рамзӣ барои баргузории ин нишасти бонуфуз интихоб шудааст, зеро он шаҳри тамаддунофар ва дорои таърихи қадима мебошад.

Ба таъкиди роҳбари Маркази дипломатияи халқии СҲШ сарфи назар аз ҳар гуна низоми сиёсӣ ва иқтисодӣ, истифодаи ниҳоди дипломатияи халқӣ бо дарки маънои он дар мустаҳкам намудани робитаҳои байнипарлумонӣ, фаъолгардонии ҳамкории ниҳодҳои ҷомеаи шаҳрвандӣ хеле мусоидат хоҳад кард.

 

Мирасрор АҲРОРОВ, “Ҷумҳурият”, шаҳри Тошкент