Раиси Бонки миллии Тоҷикистон Ҳоким Холиқзода бо ҳайати Хазинаи байналмилалии асъор (ХБА) таҳти роҳбарии муовини директори Департамент оид ба кишварҳои Шарқи Наздик ва Осиёи Марказӣ ҷаноби Субир Лалл мулоқот кард, ки дар он масъалаҳои таҳкими равобити дуҷониба ва татбиқи лоиҳаҳои муштарак мавриди баррасӣ қарор гирифтанд. 

Ҳоким Холиқзода ба ҳайати ниҳоди байналмилалии молиявии бонуфуз барои ҳамкориҳои мутақобилан судманд ва ҳиссагузорӣ дар рушди устувори иқтисодии кишвар, аз ҷумла низоми бонкӣ, арзи сипос намуда, сафари Субир Лалл ва ҳамроҳонашро, ки баъд аз гуфтушунидҳои фосилавии 2-сола ба Ҷумҳурии Тоҷикистон ташриф оварданд, муҳим ва саривақтӣ хонд.

Раиси БМТ Субир Лалл ва ҳамроҳонашро бо вазъи макроиқтисодӣ ва низоми бонкии ҷумҳурӣ шинос намуда, зикр кард, ки бо вуҷуди вазъи феълии сиёсиву молиявии ҷаҳонӣ, ки ба иқтисодиёти кишварҳо, аз ҷумла Тоҷикистон, бетаъсир нест, рушди иқтисодиёти ҷумҳурӣ дар 5 моҳи соли равон 7,4 фоизро ташкил дод, сатҳи таваррум дар моҳҳои январ-май ба 3,9 фоиз баробар шуд, ки назар ба ҳамин давраи соли гузашта 0,5 банди фоизӣ паст мебошад. Дар маҷмуъ, новобаста аз афзоиши фишорҳои берунӣ, Бонки миллии Тоҷикистон дар соли 2021 ва 5 моҳи соли 2022 фаъолияти худро бо нишондиҳандаҳои мусбат ҷамъбаст намуд.

Ҷаноби Субир Лалл барои  пазироии самимӣ ба роҳбарияти Бонки миллии Тоҷикистон изҳори сипос намуда, мудири иҷроияи Хазинаи байналмилалии асъор дар Ҷумҳурии Тоҷикистон ҷаноби Мэтю Гертнерро, ки ба тозагӣ ба вазифаи мазкур интихоб гардида, бори нахуст ба Бонки миллии Тоҷикистон ташриф овардааст, муаррифӣ кард.

- Ҳадаф аз ташрифи ҳайати ХБА ба Ҷумҳурии Тоҷикистон омӯзиши вазъи кунунии иқтисодиёт, аз ҷумла низоми молиявӣ-бонкӣ буда, дар ин сафар, ки аз 16 то 22 июн идома меёбад бо як қатор вазорату идораҳои калидии кишвар мулоқот анҷом хоҳем дод, - иброз дошт Субир Лалл.

Ҳоким Холиқзода барои идома бахшидани ҳамкорӣ бо ХБА баҳри дар оянда татбиқ намудани барномаҳои нав ва ҷалби кумакҳои техникӣ дар самти суботи молиявӣ, сиёсати пулию қарзӣ ва асъорӣ, идоракунии босамари захираҳои байналмилалӣ, таҳлил ва идоракунии хавфҳо,  танзим ва назорати низоми бонкӣ, тақвият бахшидани заминаи меъёрии ҳуқуқӣ дар бахши низоми пардохт, рушди хизматрасонии молиявии рақамӣ ва низоми комплеанс изҳори ҳавасмандӣ кард.

 

Муҳаммадзоиршо ШАРИФЗОДА,

“Ҷумҳурият”