Хабарҳо
Вазири корҳои хориҷӣ сафири Арабистони Саудиро ба ҳузур пазируфт
Вазири корҳои хориҷии Ҷумҳурии Тоҷикистон Сироҷиддин Муҳриддин сафири фавқулода ва мухтори Подшоҳии Арабистони Саудӣ дар Ҷумҳурии Тоҷикистон Валид ибни Абдурраҳмон ар-Рушайдонро ба ҳузур пазируфт.
Ба иттилои вазорат, дар мулоқот ҷонибҳо атрофи ҳолати кунунии муносибатҳои дуҷониба ва бисёрҷониба, ҳамкориҳо дар чаҳорчӯбаи созмонҳои байналмилалӣ, дурнамои густариши равобит байни кишварҳо ва дигар масъалаҳои муштарак мубодилаи афкор намуданд.
Таҳкими ҳамкорӣ дар амри мубориза бо таҳдидҳои замони муосир
Вазири корҳои дохилӣ Рамазон Раҳимзода бо муовини амниятӣ ва интизомии вазири кишвари Ҷумҳурии Исломии Эрон Сайид Маҷид Мираҳмадӣ, ки дар ҳайати гурӯҳи корӣ барои амалисозии созишномаҳои қаблан имзошуда ба Тоҷикистон ташриф оварданд, вохӯрд.
Ба иттилои маркази матбуоти Вазорат, дар суҳбат зикр гардид, ки сол то сол ҳамкориҳои тарафайн дар асоси созишномаҳои дуҷонибаю бисёрҷониба рушду такомул ёфта, ин ҳамкориҳои мутақобилан судманд метавонанд баҳри мубориза бо зуҳуроти номатлуб ва хатару таҳдидҳои замони муосир натиҷабахш бошанд.
Ҳамзамон, ҷонибҳо таҳкими ҳамкориҳои якҷояро дар мубориза бар зидди терроризм, экстремизм ва мубодилаи иттилоот баррасӣ карда, аз вусъат ёфтани ҳамкориҳои манфиатбахш изҳори хушнудӣ намуданд.
Густариши ҳамкорӣ байни вилоятҳои Суғд ва Ҷиззах
Раиси вилояти Суғд Раҷаббой Аҳмадзода ҳокими вилояти Ҷиззахи Ҷумҳурии Ӯзбекистон Эргаш Солиевро, ки бо як гурӯҳ меҳмонон ҷиҳати иштирок дар Ярмаркаи байналмилалии савдо “Суғд-2022” ба Хуҷанд ташриф овард, ба ҳузур пазируфт, - иттилоъ дод хадамоти матбуоти раиси вилоят.
Гуфта шуд, ки соли 2021 гардиши молу маҳсулот миёни вилоятҳои Суғд ва Ҷиззах 4 миллиону 900 ҳазор долларро ташкил додааст. Ин нишондод дар 4 моҳи сипаригардидаи соли равон қариб ба 4 миллион доллар расидааст.
Раҷаббой Аҳмадзода оид ба вазъи соҳаи саноат ва кишоварзии вилояти Суғд маълумот дода, изҳори боварӣ намуд, ки дар ҳошияи ярмарка доираҳои тиҷоратии ду вилоят созишномаҳои нави ҳамкориро имзо ва лоиҳаҳои навро амалӣ месозанд. Ҳокими вилояти Ҷиззах барои тавсеаи ҳамкориҳои мутақобилан судманд омодагии худро баён намуд.
Сафари нахустин гурӯҳи зоирони тоҷик барои адои ҳаҷ
Нахустин гурӯҳи зоирони тоҷик барои адои маносики ҳаҷ ба Шоҳигарии Арабистони Саудӣ сафар намуданд. Дар Фурудгоҳи байналмилалии Душанбе гурӯҳи зоиронро раиси Кумитаи дин, танзими анъана ва ҷашну маросим Сулаймон Давлатзода ва сафири фавқулода ва мухтори Арабистони Саудӣ дар Ҷумҳурии Тоҷикистон Валид Абдурраҳмон ар-Рушайдон гусел намуданд.
Ба маълумоти Кумитаи дин, танзими анъана ва ҷашну маросим, Сулаймон Давлатзода таваҷҷуҳи зоиронро ба риояи ҳатмии муқаррароти ҷорӣ дар мавсими ҳаҷ ҷалб намуда, гуфт, ки ҳарчанд вазъи марбут ба бемории сироятии коронавирус нисбатан ба эътидол омадааст, хатари он ҳанӯз ҳам вуҷуд дорад. Аз ин лиҳоз, дар кишвари мизбони ҳаҷ риояи ҳатмии тадбирҳои беҳдоштӣ ва чораҳои пешгирикунандаи ин бемориро ба ҷо оварда, солимии худро ҳифз намоед.
Аз ҷониби Сафорати Арабистони Саудӣ ба зоирони тоҷик туҳфаҳои рамзӣ тақдим гардиданд.
Донишгоҳи миллӣ дар олимпиадаи ҷумҳуриявӣ сазовори ҷойи якум шуд
Донишгоҳи миллии Тоҷикистон бо гирифтани бештари ҷойҳои ифтихорӣ дар олимпиадаи ҷумҳуриявӣ миёни донишҷӯёни муассисаҳои таҳсилоти олии касбии кишвар таҳти унвони «Аниси кунҷи танҳоӣ китоб аст» аз рӯйи равияи фанҳои гуманитарӣ, иқтисодию иҷтимоӣ сазовори ҷойи якум гардид.
Ҷойи дуюм ба дастаи донишҷӯёни Донишкадаи давлатии забонҳо ба номи Сотим Улуғзода насиб гашт. Мақоми сеюмро донишҷӯёни Донишгоҳи давлатии Бохтар ба номи Носири Хусрав ба даст оварданд, - иттилоъ дод маркази матбуоти Вазорати маориф ва илм.
Дар ҷамъбаст 14 донишҷӯ ҷойи якум, 13 нафар ҷойи дуюм, 10 кас ҷойи сеюм ва 18 нафар бо ифтихорнома сазовор дониста шуданд.
Вазири маориф ва илм Раҳим Саидзода ба ғолибон ва иштирокдорони фаъол диплом, ифтихорнома, медал ва туҳфаҳои хотиравӣ тақдим кард.
Устодоне, ки шогирдонашон дар озмун мақоми аввалро ба даст оварданд, аз ҷониби раёсати Донишгоҳи байналмилалии сайёҳӣ ва соҳибкории Тоҷикистон бо роҳхат ба осоишгоҳи «Хоҷа Оби гарм» ҳавасманд гардиданд.
Баёни ақида (0) Санаи нашр: №: Мутолиа карданд: 5539