ҳуқуқ
ҶИНОЯТ ВА ҶАЗО
ИФРОТГАРОӢ
Мубаллиғи “Салафия” 6 сол паси панҷара рафт
Суди шаҳри Ваҳдат шаҳрванд Муҳаммад Санговро дар ташкили фаъолияти ташкилоти экстремистӣ (ифротгароӣ) гунаҳкор дониста, ӯро ба муҳлати 6 сол аз озодӣ маҳрум кард.
Тибқи иттилои маркази матбуоти Прокуратураи генералӣ, М. Сангов, сокини шаҳри Ваҳдат, баъд аз гирифтани таълимоти динӣ дар Донишгоҳи “Азҳар Шариф”-и Ҷумҳурии Арабии Миср ба Тоҷикистон баргашта, аз моҳи сентябри соли 2019 ба тарғиби равияи “Салафия”, машғул гардидааст. Ин дар ҳолест, ки ин равия бо ҳалномаи Суди Олии Ҷумҳурии Тоҷикистон ҳамчун ташкилоти экстремистӣ эълон гардида, фаъолияташ манъ шудааст.
Дар робита ба ин амали ҷинояткорона прокуратураи шаҳри Ваҳдат нисбат ба Муҳаммад Сангов бо моддаи 3073 Кодекси ҷиноятӣ (ташкили фаъолияти ташкилоти экстремистӣ (ифротгароӣ) парвандаи ҷиноятӣ оғоз намуда, баъд аз тафтишоти пешакӣ ба суд ирсол намудааст, ки бар пояи ҳукми суд муҳлати адои ҷазоро дар муассисаи ислоҳи низомаш пурзӯр сипарӣ хоҳад кард.
ТАМАЪҶӮӢ
Ҳамза барои 7 ҳазор сомонӣ ба курсии айбдорӣ нишаст
Сардори шуъбаи барӯйихатгирии техникии Корхонаи давлатии фаръии “Бақайдгирии молу мулки ғайриманқул” дар шаҳри Конибодом Ҳамза Ҷумазода, ки қаблан дар ноҳияи Бобоҷон Ғафуров низ дар ҳамин вазифа кор кардааст, ба тамаъҷӯйӣ айбдор мешавад.
Маркази матбуоти Агентии назорати давлатии молиявӣ ва мубориза бо коррупсия хабар медиҳад, ки номбурда бо роҳи фиреб ва суиистифодаи боварӣ ҳамчун хизматчии корхона аз шаҳрванд “А” барои мусоидат намудан дар ҳуҷҷатгузории шиносномаи техникии манзили истиқоматӣ ва гирифтани қарори эътироф намудани соҳибмулкии манзили истиқоматиаш 7 ҳазор сомонӣ талаб карда гирифтааст.
Вобаста ба ин ҳолат, нисбат ба Ҳамза Ҷумазода бо моддаҳои 247 қисми 2 бандҳои “в,г” (қаллобӣ бо истифода аз мақоми хизматӣ) ва 324 қисми 1 (гирифтани мукофот бо роҳи тамаъҷӯӣ) Кодекси ҷиноятӣ парвандаи ҷиноятӣ оғоз гардида, баъд аз анҷоми тафтишоти пешакӣ бо тасдиқи фикри айбдоркунӣ барои моҳиятан баррасӣ намудан ба суд ирсол шудааст.
МАРДУМФИРЕБӢ
Тафтишоти амалкарди зане, ки ба қаллобӣ гумонбар мешавад
Кормандони мақомоти милитсия алайҳи хонуме, ки маркази матбуоти Вазорати корҳои дохилӣ аз ӯ зани 50-солаи сокини ноҳияи Рӯдакӣ ном мебарад, тафтишот оғоз намудаанд.
Бино ба иттилои маркази матбуоти Вазорат, ин зан соли 2008 бо роҳи фиреб ба бовари марди 51-солаи сокини ноҳияи Рӯдакӣ даромада, аз ӯ 25 ҳазор доллари амрикоӣ гирифта, то ҳол маблағашро барнагардондааст. Ин ҳолат баъд аз муроҷиати марди 51-сола ба ШВКД-2 дар ноҳияи Шоҳмансур ошкор шуда, феълан тафтишот идома дорад.
Шуъбаи ҳуқуқи рӯзномаи «Ҷумҳурият»
Баёни ақида (0) Санаи нашр: 23.06.2022 №: 120 Мутолиа карданд: 2681