16 июни соли ҷорӣ Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба ноҳияи Дӯстӣ ташриф оварданд. Меҳмони олиқадрро роҳбарият ва сокинони заҳматкаши ноҳия дар сатҳи баланд пешвоз гирифтанд. 

 

Пешвои миллат дар доираи сафари корӣ аз рафти корҳои таъмиру навсозӣ ва мумфаршкунии роҳҳои маркази ноҳия ва корхонаи истеҳсолии ҶДММ «Ганҷи Деҳа» дидан карданд. Корхонаи саноатӣ ду намуд равған ва собун истеҳсол менамояд. Сарвари давлат, ҳамзамон, бо ҷараёни кишти такрории шолӣ дар Хоҷагии деҳқонии «Ашӯрбек-2012» боздид ба амал оварда, аз кори деҳқонони шоликор қаноатманд гаштанд.

Дар идомаи сафари корӣ ба Хоҷагии деҳқонии ба номи Муҳаммад Осимӣ ташриф оварда, ба ҷамъоварии ангури пешпазак оғоз бахшиданд ва, ҳамзамон, бо пахтазори ҶСП «Ҷунтай Хатлон Син Силу» шинос шуданд. 

Сарвари давлат баъди боздид қаноатмандии хешро аз кори деҳқонони ноҳия изҳор намуда, иброз доштанд, ки ҳама аз як гиребон сар бароварда, аҳлона меҳнат карда ва озуқавории ҷомеаро барои ду сол ҷамъовариву захира намоем.

Деҳқонони ноҳия ҷавобан ба таваҷҷуҳ ва ғамхориҳои Президенти мамлакат ваъда доданд, кӯшиш ба харҷ медиҳанд, ки ҳар як супориши Пешвои миллатро сармашқи кори худ намуда, ҳар як ваҷаб замини киштро самаранок истифода бурда, дар иҷрои нақшаи озуқаворӣ саҳми худро мегузоранд.                                       

 

Сулаймони Ҷамили МУШКИН, сармуҳаррири рӯзномаи «Паёми Дӯстӣ»