Бахшида ба 25-солагии Рӯзи Ваҳдати миллӣ дар шаҳри Душанбе Фестивали байналмилалии эҷодиёти бадеии кӯдакон ва наврасон таҳти унвони “Шукуфаҳои пойтахт” баргузор гардид. Маросими ифтитоҳи расмии Фестивал дар Муассисаи давлатии “Маркази кӯдакон ва наврасони шаҳри Душанбе” бо иштироки муовини раиси шаҳри Душанбе Дилбар Одилзода, сардори сарраёсати маорифи шаҳр Баҳром Исмоилзода ва ҳайати ҳакамон баргузор гардид. 

Дилбар Одилзода паёми шодбошии раиси шаҳри Душанбе Рустами Эмомалиро ба иштирокчиён ироа намуда, зикр кард, ки баргузории Фестивал иқдоми фароҳамоварандаи шароити дӯстонаи эҷодӣ миёни насли наврас арзёбӣ гардида, он дар пайравӣ ба сиёсати маърифатпарваронаи Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон созмон ёфта, ба таъмини шароити мусоид баҳри таҳкими муносибатҳои дӯстона байни кӯдакон ва наврасони соҳибистеъдод, омӯзиш ва арҷгузорӣ ба таъриху фарҳанг, санъат ва, дар ин замина мусоидат ба рушди эҷодиёти мусиқиву бадеии насли наврас, ҳамзамон, муаррифии шаҳри Душанбе ҳамчун шаҳри дорои имкониятҳои рушди кӯдакон мусоидат менамояд.

Дар Фестивал ҳайатҳои эҷодии кӯдакону наврасон иборат аз 300 нафар аз Россия, Ӯзбекистон, Қазоқистон, Ҳиндустон, Афғонистон ва Тоҷикистон дар бахшҳои рақс, суруд ва навозандагӣ ҳунарнамоӣ карданд. Иштирокчиён, инчунин, бо мақсади ошноӣ аз таъриху фарҳанги миллати тоҷик аз маконҳои таърихӣ, боғҳои истироҳатӣ ва осорхонаву театрҳо дидан намуданд. Аз ҷумла, тибқи нақшаи корӣ иштирокчиён ба шаҳри Ҳисор сафар намуда, доир ба таъриху фарҳанги шаҳрдории мардуми тоҷик шинос шуданд. Ҳамзамон, аз Муассисаи давлатии “Кохи Наврӯз”, ки яке аз маконҳои зебои пойтахт ба ҳисоб меравад, дидан намуда, бо тарҳи нотакрори нақшу нигор ва кандакориҳои ин Муассиса ошно гардиданд.  

Тибқи барномаи Фестивал дар Муассисаи давлатии кӯдакон ва наврасони шаҳри Душанбе озмуни мусиқавии иштирокчиён аз рӯйи номинатсияҳои вокал, хореография ва навозандагӣ баргузор гардид. Ба ҳунару маҳорати иштирокчиёни озмун раиси Иттифоқи нависандагон Низом Қосим, Ҳунарманди халқии СССР Ҷӯрабек Муродов, Ҳунарманди халқии СССР Зебо Аминзода, Ҳунарманди халқии Тоҷикистон Адҳам Холиқов, ректори Донишкадаи давлатии фарҳанг ва санъати Тоҷикистон Муҳриддин Низомӣ ва раиси Иттифоқи композиторони Тоҷикистон Амирбек Мӯсоев баҳогузорӣ намуданд.

Дар маросими пӯшидашавии Фестивал, ки бо иштироки муовини раиси шаҳри Душанбе Дилбар Одилзода, намояндагони сохторҳои гуногун, ҳайати ҳакамон ва иштирокчиён ҷараён гирифт, ба ғолибон сипоснома ва туҳфаҳо супурда шуд. 

Шаҳзода АШУРАЛИЕВА, таҷрибаомӯзи “Ҷумҳурият”