РИШВА

Ҷавобгарии адвокате, ки бо 4000 сомонӣ ҳаёташро доғдор кард

Адвокат ё вакили дифое, ки барои бекор кардани ақди нигоҳ аз як шаҳрванд 4000 сомонӣ талаб намуда буд, дар суд муҳокима мешавад. 

Агентии назорати давлатии молиявӣ ва мубориза бо коррупсия хабар дод, ки Баҳром Маруфов, адвокати Коллегияи адвокатҳои “Суғд”, бо мақсади тасарруфи молу мулки ғайр бо роҳи фиреб ва суиистифодаи боварӣ аз шаҳрванд “А” барои бекор кардани ақди никоҳи ӯ ва ҳамсараш 4000 сомонӣ талаб намудааст, ки ҳангоми гирифтани ин маблағ дастгир гардид. 

Вобаста ба ин ҳолат нисбат ба Баҳром Маруфов бо моддаи 247 қисми 2 бандҳои “в,г” Кодекси ҷиноятӣ (қаллобӣ бо расондани зарари ҷиддӣ ба шаҳрванд ва истифода аз мақоми хизматӣ) парвандаи ҷиноятӣ оғоз гардида, ҳоло бо тасдиқи фикри айбдоркунӣ барои моҳиятан баррасӣ намудан ба суд ирсол шудааст.

 

 

 

ҚАЛЛОБӢ

Боздошти зане, ки хонафурӯшро ба доми фиреби худ даровард

Кормандони мақомоти корҳои дохилӣ як сокини шаҳри Душанбе (зани 50-сола)-ро бо гумони содир кардани ҷинояти қаллобӣ дастгир карданд.

Бино ба иттилои маркази матбуоти Вазорати корҳои дохилӣ, боздоштшуда моҳи декабри соли 2021 бо роҳи фиреб ба боварии марди 53-солаи сокини пойтахт даромада, аз ӯ хонаи истиқоматӣ, воқеъ дар кӯчаи Зарафшонро ба маблағи 350 ҳазор сомонӣ харидорӣ намуда, ваъда додааст, ки дар муддати кӯтоҳ маблағашро медиҳад. Вале хонаро ба нафари дигар фурӯхта маблағро то ҳол барнагардондааст, ки аз рӯи ин ҳодиса тафтишот оғоз шуд. 

 

 

 

ДУЗДӢ

Милитсия ба дасти гумонбар завлона зад

Маъмурони милитсия дар шаҳри Бохтар марди 33-солаеро боздошт намуданд, ки дар дуздии молу ашё гумонбар мешавад.

Шахси гумонбар 26 июни соли ҷорӣ бо роҳи пинҳонӣ ба хонаи истиқоматии ҷавондухтари 22-сола даромада, аз он ҷо молу ашёи рӯзгорро дуздидааст. Дар пайи ин амал маблағи зарар 15 ҳазору 570 сомонӣ ҳисоб шуда, вобаста ба ин ҳолат тафтишот идома дорад.  

 

Шуъбаи ҳуқуқи рӯзномаи «Ҷумҳурият»