АРЗИШИ НУРИИ МИНЕРАЛӢ БОЛО РАФТ. ЧАРО?

 

Хуршед Каримзода, сардори Хадамоти гумрук, ба суоли хабарнигори рӯзнома дар хусуси бо нархи баланд ворид шудани нурии минералӣ дар нимсолаи аввали соли ҷорӣ посух дод, ки сабаби асосии қиматшавии нархи ин маводи барои соҳаи кишоварзӣ муҳим боло рафтани арзиши он дар худи давлатҳои истеҳсолкунанда аст. 

- Дар ин давра агарчи ҳаҷми воридоти нурии минералӣ назар ба шашмоҳаи соли гузашта наздики 39 ҳазор тонна коҳиш ёфтааст, маблағи он 6 миллион доллар ё 21 дарсад зиёд аст. Дар маҷмуъ,  ба кишвар зиёда аз 104 ҳазор тонна нурии минералӣ бештар аз Ӯзбекистон, Россия, Туркманистон ва Афғонистон оварда шудааст, - гуфт номбурда.

Иттилоъ дода шуд, ки дар ин давра аз маблағи умумии гардиши тиҷорати хориҷӣ 2 миллиарду 322 миллион долларро воридот ва 1 миллиарду 389,7 миллион долларро содирот ташкил медиҳад.

 

Ташрифулло САЪДУЛЛОЕВ, “Ҷумҳурият”

 

 

 

 

ҲИФЗИ МУҲИТИ ЗИСТ 

50 ҲАЗОР ЛАМПАИ СИМОБДОР БЕЗАРАР ГАРДОНДА ШУД

 

Дар шаш моҳи сипаришуда дар мамлакат беш аз 50 ҳазор дона лампаҳои каммасрафи симобдор коркард ва безарар гардонда шуд. Ин кор аз ҷониби ҶСК «Чароғ»-и шаҳри Исфара баъди бо таҷҳизот ва мутахассисони ботаҷриба таъмин кардан, роҳандозӣ гардид. 

Дар ин бора Зарафо Қиёмзода, муовини аввали раиси Кумитаи ҳифзи муҳити зист, зимни нишасти матбуотӣ иттилоъ дод.

Ба гуфтаи номбурда, Ҳукумати Ҷумҳурии Тоҷикистон бо мақсади оқилона истифода бурдани неруи барқ ва дар баробари ин, таъмини пурраи аҳолӣ бо барқ як муддат истифодаи чунин лампаҳоро ба роҳ монда буд. Ҳоло тибқи қарори Ҳукумат воридот, истеҳсол ва фурӯши лампаҳои каммасрафи симобдор дар ҳудуди кишвар манъ шуда, дар корхонаю коргоҳҳои саноатӣ коркард ва безараргардонии онҳо идома дорад. Барои ҷамъоварӣ, нигоҳдорӣ ва безараргардонии лампаҳои симобдор қариб 2 ҳазор нуқтаи қабули лампаҳои аз истифода баромада ташкил шуда, ба ин восита наздики 2 миллион лампа ҷамъоварӣ гардид. 

Дар ҷумҳурӣ корхонаи истеҳсоли фурӯзонакҳои деодӣ бо иқтидори умумии 12 миллион лампа ба истифода дода шудааст, ки марҳила ба марҳила сокинони кишвар бо лампаҳои деодӣ таъмин мешаванд. Яъне, гузариш аз лампаҳои каммасраф ба лампаҳои деодӣ дар кӯтоҳтарин фурсат сурат мегирад.

 

Оҳистамоҳ ВАФОБЕК, «Ҷумҳурият»

 

 

 

 

БОЛОРАВИИ НАРХИ МАҲСУЛОТ

 

САБАБ МАҲДУДИЯТ ҶОРӢ КАРДАНИ БАЪЗЕ  ДАВЛАТҲО БАРОИ СОДИРОТ

 

Сафаралӣ Қурбонзода, муовини сардори Хадамоти зиддиинҳисорӣ, дар нишасти матбуотӣ гуфт, ки яке аз сабабҳои асосии болоравии нархи маҳсулот дар бозорҳои мамлакат он аст, ки бисёре аз давлатҳо барои содироти маҳсулоти худ маҳдудият ҷорӣ намудаанд. Инчунин, дар баъзе кишварҳои воридкунандаи маҳсулот болоравии нарх ба назар мерасад.  

Ба гуфтаи ӯ, таҳлилу омӯзиши вазъи бозори гандуму орд ва динамикаи нархҳо ба ҳолати имрӯза нишон медиҳанд, ки нархи гандуми аз Ҷумҳурии Қазоқистон харидоришаванда, ки яке аз содироткунандагони калидии маҳсулоти орд ва гандум ба ҷумҳурӣ аст, нисбат ба ҳамин давраи соли гузашта аз 245 – 250 то 380 – 405 доллар афзудааст. Соли равон бозори воридоти гандум рақобатпазир буда, иштирокчиёни бозори молӣ 55 субъекти хоҷагидорро ташкил медиҳад ва аз ҷониби онҳо ба ҷумҳурӣ 374,2 ҳазор тонна гандум ба маблағи 119,3 миллион доллар бо нархи миёнаи 319 доллар барои як тонна ворид шуд. Дар ин давра дар ҷумҳурӣ 227,5 ҳазор тонна орд истеҳсол гардид.

Таъкид гардид, ки мониторинги бозори маводи сӯзишворӣ нишон дод, ки аз охирҳои моҳи майи соли равон коҳишёбии нархи чаканаи сӯзишворӣ, аз ҷумла бензин, сӯзишвории дизелӣ ва гази моеъ дар нуқтаҳои фурӯши сӯзишворӣ ба мушоҳида расид. Вале, сӯзишвории дизелӣ аз оғози моҳи июли соли равон тамоюли болоравӣ касб намуд. 

- Мувофиқи маълумот моҳҳои январ – июни соли равон ба ҷумҳурӣ 352,1 ҳазор тонна маҳсулоти нафтӣ ба маблағи 283,2 миллион доллар бо нархи миёнаи 804 доллар ворид гардид, ки нархи миёнаи воридотии он нисбат ба моҳҳои январ – июни соли сипаришуда 247 доллар ё 44,3 дарсад баланд аст.

 

Кароматулло АТО,

«Ҷумҳурият»

 

 

 

 

1 МИЛЛИАРДУ 660 МИЛЛИОН СОМОНӢ  ДАРОМАД АЗ СОҲАИ АЛОҚАИ БАРҚӢ

 

Илҳомҷон Атоев, муовини аввали сардори Хадамоти алоқа, изҳор дошт, ки дар нимсолаи аввали соли ҷорӣ шумораи истифодабарандагони Интернет дар якҷоягӣ бо истифодабарандагони интернети мобилӣ ва собит 4,2 миллион нафарро дар бар гирифтааст. Барои беҳтар кардани сифати Интернет суръати воридшавии он ба ҷумҳурӣ ба 100 Гбит/сония баробар шуд, ки ин нишондод соли 2021 –ум 70 Гбит/сонияро ташкил мекард.

Ба таъкиди ӯ, барои рушди Шабакаи ҷумҳуриявии таҳвили маълумот, пеш аз ҳама, муштариён бо хатти алоҳидаи “ADSL-технология” пайваст шуда, барои бо хатти нахи нурӣ таъмин шудани муштариён дар шаҳру ноҳияҳои ҷумҳурӣ таҷҳизот ва коммутаторҳо гузошта шуданд. Ҳамчунин, барои баланд бардоштани сифати Интернет дар шаҳру ноҳияҳо таҷҳизот ва коммутаторҳои Swich D-link, DES, lES, ALС ва ААМ роҳандозӣ гардиданд. Бар замми ин, бештари шаҳру ноҳияҳо, аз қабили Душанбе, Бохтар, Кӯлоб, Норак, Хоруғ, Рӯдакӣ, Ваҳдат ва Турсунзода бо хатти нурӣ пайваст шуданд. Ин аст, ки  ҳаҷми умумии даромади хизматрасонӣ дар соҳаи алоқаи барқӣ аз тарафи ҶСК «Тоҷиктелеком» 82540,7 ҳазор сомонӣ баробар шуда, иҷрои нақша ба 100,4 дарсад рост меояд.

Даромади умумии корхонаҳои зертобеи соҳаи алоқаи барқӣ, дар маҷмуъ, ба 1 миллиарду 660 миллиону 508 ҳазору 723 сомонӣ расид. 

 

Оҳистамоҳ ГУЛБЕРДИЕВА, “Ҷумҳурият”

 

 

 

 

ДДТ 

БАРНОМАҲОИ ТАЪЛИМӢ АЗ АККРЕДИТАТСИЯИ БАЙНАЛМИЛАЛӢ ГУЗАШТАНД

 

Соли равон се барномаи таълимии ихтисосҳои «Педиатрия», «Фарматсия» ва «Кори табобатӣ» барои донишҷӯёни хориҷӣ аз ҷониби Агентии мустақили аккредитатсионӣ ва рейтингӣ – НААР аз аккредитатсияи байналмилалӣ гузашта, сертификати мутобиқат гирифтанд. 

Ин нуктаро Маҳмадшоҳ Гулзода, ректори Донишгоҳи давлатии тиббии Тоҷикистон ба номи Абуалӣ ибни Сино, зимни нишасти матбуотӣ иброз намуд. Ҳамчунин, зикр кард, ки сол ба сол шумора ва географияи муҳассилини хориҷӣ дар Донишгоҳ афзоиш ёфта, солҳои таҳсили 2021 – 2022-ум 1977 донишҷӯ аз 20 кишвари олам ба таҳсил фаро гирифта шуд. 

 

Комрон САФАР, «Ҷумҳурият»

 

 

 

ДОНИШГОҲИ ТЕХНИКӢ

2022 – СОЛИ МУҶАҲҲАЗГАРДОНИИ  ОЗМОИШГОҲҲОИ КАФЕДРАҲОИ ТАХАССУСӢ 

- Солҳои таҳсили 2021-2022 Донишгоҳи техникии Тоҷикистон ба номи академик М. С. Осимиро 1980 донишҷӯи зинаи бакалавр, 154  магистратура ва 141 маълумоти дуюми олии касбӣ хатм намуданд, ки аз ин теъдод 93 донишҷӯ ва магистр соҳиби дипломи аъло гардиданд, - гуфт Қудрат Давлатзода, ректори Донишгоҳ, дар нишасти матбуотӣ оид ба ҷамъбасти фаъолият дар нимсолаи аввали соли равон.

Ректор зикр кард, ки дар Донишгоҳ 108 озмоишгоҳи таълимӣ, илмӣ – истеҳсолӣ, зиёда аз 3000 воситаҳои техникӣ барои аз худ намудани илмҳои табиӣ ва дақиқ мавриди истифода қарор доранд. Соли 2022 дар Донишгоҳ – Соли муҷаҳҳазгардонии озмоишгоҳҳои кафедраҳои тахассус эълон шудааст. 

 

Нигина РАҲМОН, “Ҷумҳурият”