ХИЗМАТИ ҲАРБӢ

Ҷавони саркаш 18 сол паси панҷара рафт

Суди ҳарбии гарнизони Душанбе хизматчии ҳарбӣ-курсант Бахтовари Раҳмоналиро барои саркашӣ аз идомаи хизмати ҳарбӣ ва муомилоти ғайриқонунии маводи нашъаовар ба муҳлати 18 сол аз озодӣ маҳрум кард.

Тибқи иттилои маркази матбуоти Прокуратураи генералии Ҷумҳурии Тоҷикистон, нисбат ба ӯ, бар асоси ду моддаи Кодекси ҷиноятӣ – 200 қисми 4 банди “д” (муомилоти ғайриқонунии воситаҳои нашъадор ё моддаҳои психотропӣ бо мақсади ба соҳибияти каси дигар додан ба миқдори махсусан калон) ва 375 қисми 2 (фирор) айб эълон шудааст. Манбаъ зикр мекунад, Бахтовари Раҳмоналӣ пас аз хатми филиали Академияи ҳарбии ақибгоҳ ва нақлиёти шаҳри Пензаи Федератсия Россия дар соли 2017 уҳдадор буд, барои идомаи хизмати ҳарбӣ ва ба вазифаи мушаххас таъин шудан ба Вазорати мудофиаи Ҷумҳурии Тоҷикистон ҳозир гардад. Аммо бе сабаби узрнок аз идомаи хизмати ҳарбӣ саркашӣ намуда, беш аз 4 сол аз иҷрои вазифаҳои хизматии ба зиммааш гузошташуда канораҷӯӣ кардааст.

Гузашта аз ин, маҳкумшуда ба муомилоти ғайриқонунии маводи нашъаовар даст задааст, ки аз ҷониби мақомоти қудратӣ ва ҳифзи ҳуқуқ бо 18 килограмм маводи нашъаовар дастгир гардид.

 

 

 

ДУЗДӢ

Парвандаи ҷиноятӣ алайҳи зане, ки беш аз 171 ҳазор сомониро рабуд

Аз ҷониби мақомоти корҳои дохилӣ нисбат ба зани 38-солаи сокини шаҳри Исфара бо моддаи 244 қисми 3 Кодекси ҷиноятӣ (дуздӣ ба миқдори калон) парвандаи ҷиноятӣ оғоз шудааст. 

Маркази матбуоти Вазорати корҳои дохилӣ хабар дод, ки ин зан дар дуздии маблағу ҷавоҳирот гумонбар мешавад. Вай 9 июли соли ҷорӣ бо роҳи пинҳонӣ ба манзили истиқоматии зани 30-солаи сокини ҳамин шаҳр даромада, аз хона 2800 сомонӣ, 987 ҳазор рубли русӣ ва ҷавоҳироти гуногунро дуздидааст, ки маблағи умумии зарар 171 ҳазору 668 сомониро ташкил медиҳад. 

 

Шуъбаи ҳуқуқи рӯзномаи «Ҷумҳурият»