Таҳти раёсати Раиси Маҷлиси миллии Маҷлиси Олии Ҷумҳурии Тоҷикистон Рустами Эмомалӣ иҷлосияи ёздаҳуми Маҷлиси миллии Маҷлиси Олӣ, даъвати шашум баргузор гардид. Дар оғози иҷлосия аъзои Маҷлиси миллӣ қарорҳои дахлдорро оид ба тасдиқи тартиби кор, интихоби котибот ва рӯзномаи иҷлосия иборат аз 44 масъала қабул намуданд.

Тавре Наврӯз Қурбонзода, ёвари Раиси Маҷлиси миллӣ оид ба робита бо воситаҳои ахбори омма ва созмонҳои ғайридавлатӣ, ба рӯзномаи «Ҷумҳурият» иттилоъ дод, зимни муҳокимаи масъалаҳои рӯзнома раисони кумитаҳои Маҷлиси миллӣ оид ба таъмини асосҳои конститутсионӣ, ҳуқуқу озодиҳои инсон, шаҳрванд ва қонуният, оид ба масъалаҳои аграрӣ, шуғли аҳолӣ ва экология, оид ба масъалаҳои иҷтимоӣ, ҳифзи сиҳатӣ, илм, маориф, фарҳанг ва сиёсати ҷавонону занон, оид ба иқтисодиёту коммуникатсия, оид ба ҳамоҳангсозии фаъолияти Маҷлиси миллӣ бо Маҷлиси намояндагон, ҳокимияти иҷроия, иттиҳодияҳои ҷамъиятӣ, воситаҳои ахбори омма ва робитаҳои байнипарламентӣ маъруза карда, хулосаҳои кумитаҳои соҳавиро нисбат ба қонунҳои баррасишаванда ироа намуданд.

Аъзои Маҷлиси миллии Маҷлиси Олӣ бо тартиби муқарраршуда Қонуни конститутсионии Ҷумҳурии Тоҷикистон «Оид ба ворид намудани тағйиру иловаҳо ба Қонуни конститутсионии Ҷумҳурии Тоҷикистон «Дар бораи вазъи ҳуқуқии узви Маҷлиси миллӣ ва вакили Маҷлиси намояндагони Маҷлиси Олии Ҷумҳурии Тоҷикистон», қонунҳои Ҷумҳурии Тоҷикистон «Дар бораи баробарӣ ва барҳам додани ҳама гуна шаклҳои табъиз», «Дар бораи хоҷагии ёрирасони шахсӣ», «Дар бораи моҳипарварӣ, моҳигирӣ ва ҳифзи захираҳои моҳӣ», «Дар бораи дору, молҳои тиббӣ ва фаъолияти фарматсевтӣ»  ва «Дар бораи банақшагирии стратегӣ ва дурнамосозии давлатӣ»-ро мавриди муҳокима қарор дода, онҳоро ҷонибдорӣ намуданд.

Дар доираи рӯзномаи иҷлосияи ёздаҳуми Маҷлиси миллӣ атрофи як қатор қонунҳои Ҷумҳурии Тоҷикистон оид ба ворид намудани тағйиру иловаҳо ба санадҳои қонунгузории амалкунандаи кишвар, аз ҷумла ба кодексҳои мурофиавии гражданӣ, мурофиавии иқтисодӣ, мурофиавии ҷиноятӣ, ҳуқуқвайронкунии маъмурӣ, замин, гумрук, инчунин, қонунҳои Ҷумҳурии Тоҷикистон «Дар бораи чарогоҳ», «Дар бораи фондҳои ғайридавлатии нафақа», «Дар бораи ҷамъиятҳои саҳомӣ», «Дар бораи ҷамъияти дорои масъулияти маҳдуд», «Дар бораи энергетика», «Дар бораи истифодаи манбаъҳои барқароршавандаи энергия», «Дар бораи сарфаҷӯӣ ва самаранокии энергия», «Дар бораи ҳимояи рақобат»  ва «Дар бораи реклама» мубодилаи афкор сурат гирифта, онҳо ҷонибдорӣ гардиданд.

Аъзои Маҷлиси миллӣ қонунҳои Ҷумҳурии Тоҷикистон оид ба ворид намудани тағйиру иловаҳо ба кодексҳои ҷиноятӣ ва меҳнат, инчунин, қонунҳои Ҷумҳурии Тоҷикистон «Дар бораи маориф» ва «Дар бораи озодии виҷдон ва иттиҳодияҳои динӣ»-ро ҷонибдорӣ намуданд, ки онҳо бо ҳуқуқи ташаббуси қонунгузорӣ дар асоси дастуру супоришҳои Раиси Маҷлиси миллии Маҷлиси Олии Ҷумҳурии Тоҷикистон доир ба пурзӯр намудани ҷавобгарӣ барои содир намудани ҷиноятҳо ба муқобили озодии ҷинсӣ ва дахлнопазирии ҷинсӣ нисбат ба хурдсолон ва ноболиғон, пешниҳод шудаанд.

Инчунин, дар рафти иҷлосия аъзои Маҷлиси миллӣ як қатор пешниҳодҳои Президенти Ҷумҳурии Тоҷикистонро оид ба интихоб ва бозхонд намудани роҳбарияти Суди Олии иқтисодӣ, як қатор судяҳои Суди Олӣ ва Суди Олии иқтисодии Ҷумҳурии Тоҷикистон баррасӣ карданд.

Рустами Эмомалӣ судяҳои навинтихобро ҷиҳати ҳифзи ҳуқуқу озодиҳои инсон ва шаҳрванд, манфиатҳои давлат, ташкилоту муассисаҳо ва таъмини қонунияту адолати судӣ ба хизмати софдилона даъват намуд.

Дар фарҷом Раиси Маҷлиси миллии Маҷлиси Олӣ ба Прокурори генералӣ супориш дод, ки якҷо бо дигар сохторҳои марбута вазъи муомилоти маҳсулоти тамоку ва машруботи спиртӣ дар бозори истеъмолии кишвар, бахусус пешгирии харидуфурӯши ин маҳсулотҳоро аз ҷониби ноболиғон, бо таҳлили санадҳои қонунгузории марбут ба самти мазкур ба роҳ монда, ҷиҳати такмили қонунгузорӣ дар ин самт таклифҳои мушаххас пешниҳод намояд.

 

Лашкар ШАРИФЗОДА, «Ҷумҳурият»