Дар доираи сафари корӣ ба Конфедератсияи Швейтсария, Ваколатдор оид ба ҳуқуқи инсон дар Ҷумҳурии Тоҷикистон Умед Бобозода бо мудири Дафтари минтақавии Хазинаи кӯдакони Созмони Милали Муттаҳид (ЮНИСЕФ) Афшин Хон дар шаҳри Женева мулоқот кард.

Афшин Хон бо қаноатмандӣ изҳор намуд, ки дар таърихи мавҷудияти Ваколатдор оид ба ҳуқуқи инсон дар Ҷумҳурии Тоҷикистон бори нахуст роҳбари ин ниҳод ба қароргоҳи Созмони Милали Муттаҳид дар Женева ташриф оварда, оид ба ҷанбаҳои гуногуни ҳуқуқу озодиҳои инсон ва дастовардҳои Ҷумҳурии Тоҷикистон дар соҳаи ҳуқуқи инсон бо масъулони сохторҳои дахлдори СММ вохӯриву мулоқотҳои мутақобилан судманд анҷом медиҳад.

Умед Бобозода аз ҳуҷҷатҳои муҳими стратегии мамлакат дар самти ҳифзи ҳуқуқҳои кӯдак ёдовар шуда, иброз дошт, ки риоя, эҳтиром, ҳифз ва пешбурди ҳуқуқҳои кӯдакон ва наврасон яке аз самтҳои афзалиятноки сиёсати иҷтимоии Ҳукумати Ҷумҳурии Тоҷикистон мебошад.

Ҷонибҳо, инчунин, атрофи масоили зӯроварӣ дар оила, содиршавии ҷиноят аз ҷониби ноболиғон ва нисбат ба ноболиғон, адлияи ноболиғон, гурӯҳҳои осебпазири кӯдакон, аз ҷумла кӯдакони маъюбиятдошта, табодули афкор намуданд.

Дар охир Афшин Хон омодагии худро ҷиҳати минбаъд низ тақвият додани ҳамкориҳо бо Ҳукумати Ҷумҳурии Тоҷикистон иброз намуд.

Хадамоти матбуоти Ваколатдор оид ба ҳуқуқи инсон