Пирӯзии навбатии Асрор 

Муштзани маъруфи 26-солаи тоҷик Асрор Воҳидов дар зӯрозмоии навбатиаш дар мусобиқоти бокси ҳирфаӣ (RCC Boxing Promotions, Екатеринбург) бар Евгений Ляшкови рус ғолиб омад. 

Боксчии тоҷик рақибашро ду бор ба нокдаун фиристод ва пеш аз анҷоми вақт пирӯз гашт. 

Бояд гуфт, ки Асрор Воҳидов 23 январи соли 2021 дар мусобиқаи бокси ҳирфаӣ дар Екатеринбурги Россия Тато Бонокоанеро Африқои Ҷанубӣ шикаст дода, ғолиби WBO Oriental гашта буд. 

 

 

 

ҶОМИ “ҶАВОНӢ”-2022 

Ҷуфтҳои нимфинал муайян шуданд

Тибқи қуръакашии марҳилаи нимниҳоии Ҷоми “Ҷавонӣ”- 2022, 27 июл “Регар-ТадАЗ” бо “Эсхата” ва КМВА бо “Истиқлол” барои баромадан ба финал рақобат мекунанд. 

Рақобати финалӣ ва бозӣ барои ишғоли зинаи сеюм 30 июл баргузор мешавад. 

Ғолиби аввалин мусобиқаи Ҷоми “Ҷавонӣ”-2022 соҳиби 30 ҳазор, ҷойҳои дуюму сеюм мутаносибан 20 ҳазор ва 10 ҳазор сомонӣ мегарданд. 

 

 

Мусовии дуюми «Истиқлол» дар Ӯзбекистон

Дар доираи ҷамъомади таълимию тамринӣ «Истиқлол» дар Ӯзбекистон бо дастаи «Локомотив» (Тошкент) бозии санҷишӣ гузаронд. Вохӯрии мазкур бидуни гол ба анҷом расид. 

Бар пояи иттилои дастаи «Истиқлол», бозии аввали дӯстонаи онҳо бо тими «Навбаҳор» мусовӣ (1:1) хотима ёфт. 

29 июл «Истиқлол» бо тими «Андиҷон» вомехӯрад. 

 

 

 

ТЕННИС

Алкарас дар финал бохт, аммо ба дастоварди шоён даст ёфт

Теннисбози 20-солаи итолиёвӣ Лорентсо Музетти (Италия) дар финали мусобиқоти ATP-500 (Ҳамбург, Олмон) Карлос Алкараси испаниро бо ҳисоби 2:1 (6:4, 6:7 (6:8), 6:4) дучори бохт намуд. 

Фонди ҷоизаи мусобиқа 1 770 865 евроро ташкил медиҳад. 

Ёдовар мешавем, ки Алкарас пас аз ба финали мусобиқоти Ҳамбург баромадан дар радабандии АТР шомили панҷгонаи беҳтаринҳо шуд. 

Ҳамин тавр, Алкараси 19-сола ҷавонтарин теннисбози 17 соли охир аст, ки ба ин дастовард ноил гашт.

 

Маҳмуд БАҲРОМ, шореҳи варзиш