23 июл баландтарин ҳарорати гармӣ дар ноҳияи Ванҷ аз ҷониби ниҳодҳои обуҳавосанҷӣ ба қайд гирифта шуд. Аз шиддати гармӣ пиряхҳо об гашта, ба ҳаракат даромаданд. Аз ҷумла, пиряхи болои мавзеъҳои Лалмига, Дуобгии ҳудуди деҳоти ба номи Муҳаммадулло Абдуллоев ва дараи Бунайи деҳоти Ҷовидон лағжида, сабабгори банд шудани оби дарёчаҳои Рохарв ва Бунай гардид. 

 

Мавҷҳои оби рӯдҳои кӯҳӣ бо шасти баланд дарахтон ва киштаҳои соҳили дарёчаҳо ва панҷ пули пиёдагузарро вайрону валангор карданд. Аз ҳама зиёд ба иншооти таъмини оби нӯшокӣ ва полизӣ хисороти бештар расонданд. Хатҳои обгузар ва сарҷӯйборҳо қариб саросар аз истифода баромаданд.

Тайи се рӯз сокинони маркази ноҳия, шаҳраки Рохарв ва деҳаҳои гирду атрофи он бе об монданд. Дар чунин вазъияти душвор Мақомоти иҷроияи маҳаллии ҳокимияти давлатии ноҳия чораҳои мушаххас андешида, тариқи нақлиёт мардумро бо оби нӯшокӣ таъмин карданд. Ҳамчунин, булдозеру экскаваторҳои Муассисаи давлатии нигаҳдории роҳҳои автомобилгард, қитъаи беҳдошти замин ва обёрии ноҳия ва Ҷамъияти дорои масъулияти маҳдуди «Ҷовид» ба бартараф кардани оқибатҳои харобиовари ин ҳодисаи табиӣ равона шуданд. 

 Дар ноҳия ситоди мубориза ба муқобили офати табиӣ бо сарварии раиси ноҳия Одинашо Мардзода амал мекунад. Вазифаи аввалиндараҷаи ситод дар кӯтоҳтарин фурсат бартараф кардани оқибатҳои офати табиӣ, барқарор намудани иншооти обрасонӣ, инчунин, азнавсозии роҳу пулҳо ва ҳисоби зарари расида ба иқтисодиёти ноҳия ва сокинон иборат мебошад.

 

Муҳаммадзоиршо ШАРИФЗОДА, «Ҷумҳурият»,

Сироншоҳи ДИЛОВАР, рӯзноманигор