Ширкати 12 шоҳмотбози тоҷик  дар ин мусобиқа

Бар пояи иттилои Кумитаи миллии олимпии кишвар, дастаи мунтахаби шоҳмотбозони Тоҷикистон иборат аз 12 нафар: Надежда Антонова, Мутриба Ҳотамӣ, Сабрина Абророва, Рухшона Саидова, Лидия Антонова, Саодат Одинаева, Муҳаммад Ҳусейнхоҷаев, Алишер Каримов, Мустафохоҷа Ҳусейнхоҷаев, Меҳриддин Шарифов, Илҳоми Ҷалолиддин ва Шораҳмат Ҳисориев бо мақсади иштирок дар Олимпиадаи ҷаҳонии шоҳмот ба Ҳиндустон сафар намуд.

Дар 45-умин Олимпиадаи ҷаҳонии шоҳмот, ки аз 28 июл то 9 августи соли равон дар шаҳри Ченнайи Ҳиндустон баргузор мегардад, 188 тими мардон ва 150 тими бонувон ширкат хоҳанд кард.

Шуруъ аз соли 1924 олимпиада дар 2 сол як маротиба баргузор мешавад. Бо сабаби пандемияи коронавирус солҳои 2020, 2021 олимпиада ба таври фосилавӣ доир гардида буд. 

 

 

 

Пирӯзии навбатии  Магнуси норвегӣ 

Қаҳрамони феълии ҷаҳон оид ба шоҳмот Магнус Карлсени норвегӣ пеш аз муҳлат дар сабқати SuperUnited Rapid & Blitz Croatia – марҳилаи сеюми силсилаи сабқатҳои Grand Chess Tour 2022 бо 22,5 хол ғолиб омад. 

Тибқи маълумоти сомонаи www.rambler.ru, дар панҷгона Алиризо Фирӯзҷоҳ (Франсия, 21 хол), Уэсли Со (ИМА, 21 хол), Максим Вашйе-Лаграв (Франсия, 21 хол) ва Ян Непомняший (Россия, 20 хол) шомил шуданд. 

 

 

 

Боз  як футболбози тоҷик ба хориҷа рафт 

Футболбози мунтахаби ҷавонони кишвар (U-20)  ва дастаи «Динамо» Абдулфаттоҳ Худойдодзода корномаи варзишиашро дар тими «Динамо-Брест»-и Беларус давом медиҳад. 

Тавре Лигаи футболи Тоҷикистон хабар медиҳад, футболбоз бо ин тим ба муҳлати яку ним сол шартнома ба имзо расондааст. Мавсими гузашта Абдулфаттоҳ дар ҳайати «Динамо» беҳтарин нишонзани лигаи аввали Тоҷикистон гардида буд. Дар ин мавсим бошад, ӯ дар 11 бозӣ 9 тӯб ба самар расондааст. 

Дастаи нави бозигари тоҷик пас аз марҳилаи аввали чемпионати Беларус мавқеи 15-умро ишғол мекунад. 

Абдулфаттоҳ, аллакай, дар як бозии рафиқона муқобили дастаи «Стэнлес» дар ҳайати асосӣ вориди майдон шуда, муаллифи партофти головар гардид.

 

Маҳмуд БАҲРОМ, шореҳи варзиш