Вазири кишоварзӣ Саъдӣ Каримзода дар ҷаласаи 7-уми вазирони кишоварзии Созмони ҳамкории Шанхай, ки доир ба масъалаҳои кишоварзӣ таҳти раёсати Ҷумҳурии Ӯзбекистон баргузор гардид, иштирок ва суханронӣ кард.

Ба иттилои маркази матбуоти Вазорат, дар ҷаласа роҳбарони ҳайатҳои кишварҳои аъзо доир ба таҳкими ҳамкориҳо дар самти таъмини амнияти озуқаворӣ ва андешидани чораҳои зарурӣ ҷиҳати бартараф намудани монеаҳои мавҷуда миёни кишоварзҳо сухан ронда, тақвияти робитаҳои муштаракро вобаста ба афзоиши содироти маҳсулоти озуқаворӣ миёни мамлакатҳо, дастгирии ташаббусҳои давлатҳои аъзо доир ба масъалаҳои кишоварзӣ, инчунин, пайгирӣ ва татбиқи муқаррароти Созишнома байни ҳукуматҳои кишварҳои аъзои СҲШ-ро саривақтӣ арзёбӣ намуданд.

 

 

 

Баррасии масъалаи пешгирии ҷиноятҳои муташаккили  фаромиллӣ 

Зимни вохӯрӣ миёни Прокурори генералии Ҷумҳурии Тоҷикистон Юсуф Раҳмон ва Прокурори генералии Федератсияи Россия Игор Краснов робитаҳои зич ва муҳими мақомоти прокуратураи кишварҳо махсус таъкид шуданд,- хабар дод маркази матбуоти Прокуратураи генералӣ.

Ҷонибҳо паҳлуҳои гуногуни ҳамкориро дар самти пешгирии ҷиноятҳои  муташаккили  фаромиллӣ, таъмини амният дар минтақа, киберҷинояткорӣ, аз байн бурдани хатарҳои мавҷудаи дохилӣ, ки ба ҷобаҷогузории идеологияҳои мухталифи динӣ-радикалӣ дар ҷомеа алоқаманданд, баррасӣ намуданд.

Вобаста ба вазъи мураккаби Афғонистон, мубориза бо терроризму экстремизм ва пешгирии муомилоти ғайриқонунии маводи мухаддир мубодилаи афкор сурат гирифт. Ҳамчунин, ҳамкорӣ дар самти тафтиши муштараки  парвандаҳои ҷиноятӣ, андешидани чораҳои фаврӣ-ҷустуҷӯӣ, истирдод ва дигар масъалаҳои муҳим матраҳ гардиданд.

Дар охир лоиҳаи Барномаи ҳамкорӣ байни прокуратураҳо ба имзо расид.

 

 

 

Ёддошти тафоҳум миёни корхонаҳои Тоҷикистон ва Туркия

Дар доираи ҳамкориҳои мутақобилан судманди Тоҷикистон бо Туркия дар самтҳои саноат ва соҳибкорӣ бо ташаббус ва мусоидати сафири фавқулода ва мухтори Тоҷикистон дар Туркия Ашрафҷон Гулов гурӯҳи соҳибкорони шаҳри Болуи Туркия бо сафари шиносоӣ ба Тоҷикистон омаданд. Ҳадаф аз ин, дарёфти шарики боэътимоди ҳамтоёни тоҷик, татбиқи лоиҳаҳои муштараки сармоягузорӣ ва бунёди корхонаҳои тиҷоратӣ мебошад. 

Гуфта мешавад, ки ба нақша гирифтани чунин ҳамкориҳо, гувоҳи фаъолияти густурда ва боэътимоди сафири фавқулода ва мухтори Тоҷикистон дар Туркия Ашрафҷон Гулов мебошад, ки барои таъсиси корхонаҳои муштарак тадбирҳои зарурӣ меандешад.

Дар доираи сафар, Сафорати Туркия дар Душанбе мулоқоти ҳайатҳои тиҷоратии  ду кишвари дӯстро роҳандозӣ намуд, ки дар он сафири фавқулода ва мухтори Ҷумҳурии Туркия дар Ҷумҳурии Тоҷикистон Эмре Зеки Карагёл иштирок дошт. 

Ҷиҳати табодули таҷрибаи корхонаҳои истеҳсолӣ директори ҶДММ «Сифат саноат» Ҳокимшо Идиев яке аз омилҳои рушдро дар ин самт ташкили корхонаҳои муштарак арзёбӣ намуд.

Бо мақсади ба роҳ мондани ҳамкорӣ байни корхонаҳои дӯзандагии ҶДММ “Сифат саноат”-и Тоҷикистон ва Ҷамъияти саҳомии “DUNDARIAR”-и Туркия, Ёддошти тафоҳум имзо шуд.