Раиси Бонки миллии Тоҷикистон Ҳоким Холиқзода бо сафири фавқулода ва мухтори Ҷопон дар Ҷумҳурии Тоҷикистон ҷаноби Тосихиро Аики вохӯрд. Ҷонибҳо оид ба вазъи феълии равобит дар бахшҳои иқтисодиву иҷтимоӣ ва имконияти густариши минбаъдаи он табодули афкор намуданд.

Ҳоким Холиқзода ба Ҳукумати Ҷопон барои ҳамкориҳои мутақобилан судманд ва ҳиссагузорӣ дар рушди иҷтимоиву иқтисодии кишвар миннатдорӣ баён карда, таъкид дошт, ки дар доираи сиёсати пешгирифтаи Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон муносибатҳои иқтисодиву иҷтимоӣ бо давлатҳои пешрафтаи ҷаҳон, аз ҷумла бо Ҷопон, сол ба сол тақвият меёбад.

Ҳоким Холиқзода аз саҳми Ҷопон дар рушди иқтидори кадрии мамлакат, бахусус Бонки миллии Тоҷикистон дар доираи лоиҳаи пешниҳоди идрорпулӣ барои омодасозии мутахассисон дар донишгоҳҳои Осиё ва уқёнуси Ором, ёдрас шуд. 

Сафир Тосихиро Аики ба тавсеаи ҳамкорӣ дар самтҳои барои ҷониби Тоҷикистон, бахусус низоми бонкӣ таваҷҷуҳ намуда, омодагии хешро  ҷиҳати мусоидат ба тақвияти самтҳои  муҳими ҳамкорӣ изҳор дошт. Мавсуф аз оғози раванди  ҳамкорӣ  ҷиҳати   сармоягузорӣ   ба   низоми бонкии Ҷумҳурии Тоҷикистон аз ҷониби Ҷопон истиқбол карда, рушди ҳамкориро бо истифода аз имкониятҳои молиявӣ ба низоми бонкӣ муҳим арзёбӣ намуд.

 

Муҳаммадзоиршо ШАРИФЗОДА, 

“Ҷумҳурият”