Дар Иттифоқи нависандагони Тоҷикистон дар мавзуи «Инъикоси бунёди Неругоҳи барқи обии «Роғун» дар асарҳои бадеӣ» мизи гирд баргузор гардид. Ҳадафи мизи мудаввар ба ҳам овардани адибони очеркнавис, воқеанигор ва тарғиби бунёдкориҳои азими мамлакат буд.

 

Дар ҷаласа раиси ИНТ Низом Қосим иштирок карда, дар мавриди аҳамияти ин сохтмони аср барои ояндаи Тоҷикистон суҳбат кард.

- Асарҳое, ки дар ин мавзуъ офарида мешаванд, бояд тазодҳо, рангорангӣ ва мазмуну образҳои барҷаста дошта бошанд. Одами зинда дар он амал кунад, тақдирҳо, наслҳо бо ҳам бархӯранд ва мардум бо шукӯҳи «Роғун» ошно гарданд. Таъкиду ҳидоятҳои Пешвои миллат муҳтарам Эмомалӣ Раҳмон низ ҳамин масъалаҳоро фаро мегиранд. Сарвари давлат дар масъалаи камчин будани осори адабиву публитсистӣ дар ин бора чанде пеш дар майдони сохтмони НБО «Роғун» бо мо – адибон суҳбат оростанд  ва эродҳои Пешвои миллат асосноканд. Мо ба омӯзиш ва тарғибу ташвиқи созандагиҳои фарзандони миллат камҳавсалагӣ зоҳир мекунем, - тазаккур дод Низом Қосим.

Хабардор будани адибон аз табиати «Роғун», аз фолклори мардуми ин минтақа, аз корномаҳои мутахассисони дохиливу хориҷӣ, бахусус меҳнаткашони ватанӣ, муҳим арзёбӣ гардид.

- Ҳамкории адибонро бо воситаҳои ахбори омма бояд тақвият бахшид. Аҳли қалам бояд мавқеи худро мушаххас кунанд ва халқро бо ҷараёни бунёдкориҳои Тоҷикистон ҳар гоҳ ошно созанд, – афзуд раиси Иттифоқи нависандагон.

Бино ба таъкиди муовини раиси ИНТ Равшани Махсумзод, тарҷумаи асарҳои бадеӣ, шеърҳо ва мақолаҳо доир ба «Роғун» бо забонҳои русиву англисӣ ва ӯзбекиву туркӣ баҳри шиносоии бештари халқҳои Осиёи Марказӣ бо аҳамияти «Роғун» ва падидаи аз назари экологӣ безарар будани он мусоидат мекунад. Барои ин тақвияти кори бахши робитаҳои адабӣ корсоз аст. 

Мудири бахши очерк ва публитсистикаи Иттифоқи нависандагон Ҷумъа Қуддус атрофи масъалаҳои бозкушоии мавзуъ, амиқтар омӯхтани ин иншооти барои давлату Ҳукумат муҳим суҳбат намуд. Ба гуфтаи ӯ, ИНТ бо роҳбарияти Неругоҳ ва шаҳрдории Роғун ба мувофиқа расидаанд, ки се рӯзноманигор ва шоири ҷавон: Хуршед Ховарӣ, Беҳрӯз Холмуродов ва Бузургмеҳри Тоҷиддинро барои омӯзиши кохи нур ба муддати як сол ба дохили НБО сафарбар намоянд. Чунин амал барои таҷрибаи воқеии ҳаёту фаъолияти коргарон ва ба вуҷуд омадани осори хонданиву ҳадафрас мувофиқ мебошад.

Адибони тоҷик дар тақвияти ин гуфтаҳо изҳор доштанд, ки воқеан ҳам, имрӯз барои ҷомеа ошноӣ бо гирумони зарбдори кормандону мутахассисони «Роғун» муҳим ва рӯзмарра аст. Он, дарвоқеъ, набардгоҳи одаму кӯҳ, обу нур ва ақлу шуур аст.

 

Бузургмеҳри БАҲОДУР,

«Ҷумҳурият»