Таҳти чунин унвон бо ташаббуси Кумитаи рушди сайёҳии назди Ҳукумати Ҷумҳурии Тоҷикистон ҷиҳати рушди ҳамкории дуҷониба, тарғиби имконоти сайёҳии мамлакат дар арсаи байналмилалӣ ва муаррифии ҷанбаҳои муҳими ташаббусҳои Пешвои миллат оид ба Даҳсолаи байналмилалии амал «Об барои рушди устувор, солҳои 2018-2028» дар осоишгоҳи «Шоҳамбарӣ» Форуми байналмилалӣ баргузор гардид. 

 

Дар ҳамоиш намояндагони вазорату идораҳо, сафоратхонаҳои муқими Душанбе, коршиносон ва мутахассисони соҳаи об, ширкатҳои сайёҳии ватанӣ ва хориҷии кишварҳои Россия, Қазоқистон ва Ӯзбекистон, осоишгоҳҳо ва муассисаҳои таълимии ҷумҳурӣ, ки дар риштаи сайёҳӣ мутахассис омода менамоянд, иштирок доштанд. 

Қабл аз оғоз иштирокдорон аз намоишгоҳи имкониятҳои сайёҳӣ дидан намуданд. Раиси Кумитаи рушди сайёҳӣ Тоҷиддин Ҷӯразода зимни ифтитоҳи ҳамоиш иброз намуд, ки ҳадаф аз баргузории форум муаррифии мавзеъҳои шифобахшӣ - истироҳатии Тоҷикистон ва тавсеаи ҳамкорӣ бо дигар давлатҳо мебошад. Дар кишвар якчанд осоишгоҳ ва истироҳатгоҳҳо фаъолият менамоянд, ки дар онҳо тамоми шароит муҳайё гардидааст. Маҳз бо талошҳои созандаву бунёдкоронаи Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон захира ва имконоти обию сайёҳии кишвар ба таври шоиста дар сатҳи байналмилалӣ муаррифӣ мешаванд. 

Котиби якуми Сафорати Россия дар Тоҷикистон Олег Илишев дар ҷараёни ҳамоиш зикр намуд: «Баргузории Форум имкон медиҳад, ки мо бо якдигар мубодилаи афкор намуда, аз имконияти сайёҳии якдигар бохабар гардида, ҳамкориро густариш диҳем, зеро имрӯз соҳаи сайёҳии ҳамаи давлатҳои иштирокчӣ ба муаррифӣ ва ҳамкорӣ ниёз дорад». 

Дар идомаи Форум аз ҷониби мутахассисону коршиносони соҳаи об дар мавзуи «Обҳои шифобахши мамлакат – омили ҷалби сайёҳон» маърузаҳо ироа гардиданд. Дар анҷом миёни иштирокдорон мубодилаи афкор сурат гирифт. Изҳори умед карда шуд, ки истифодаи таҷриба ва донишҳои пешқадам дар соҳаи сайёҳии Россия, Қазоқистон, Ӯзбекистон ва Тоҷикистон ба рушди минбаъдаи ҳамкории башардӯстона ҷиҳати таҳкими робитаҳои муштараки сайёҳӣ дар минтақа мусоидати  ҳамаҷониба менамояд. 

Дар доираи  Форум бо мақсади тақвияти ҳамкориҳо ва ҷалби сайёҳон ба кишварҳои  ҳамдигар миёни субъектҳои хизматрасони сайёҳии ватанӣ ва кишварҳои Россия, Қазоқистон, Ӯзбекистон 32 созишномаи нави ҳамкорӣ ба имзо расид, ки минбаъд дар доираи онҳо равуои сайёҳон тавассути ин ширкатҳо ба кишварҳои ҳамдигар зиёдтар хоҳанд шуд.

Баъди анҷоми Форум дар шаҳри Ҳисор ҳайати намояндагони ширкатҳои хориҷӣ бо мақсади огаҳӣ ёфтан аз вазъи сайёҳии кишвари мо ва шиносоӣ бо гӯшаҳои зебои диёр ба шаҳри Турсунзода ташриф оварда, аз ангурбоғи «Сомон» дидан карданд. 

 

Нигина РАҲМОН, «Ҷумҳурият»