Дар Муассисаи давлатии “Муҷтамаи ҷумҳуриявии осорхонаҳои Кӯлоб” бо иштироки раиси шаҳри Кӯлоб Бахтиёр Назарзода ва намояндагони Вазорати фарҳангу муассисаҳои марбута ифтитоҳи намоиши сайёри “Тоҷикистон – кишвари дарёҳои тиллоӣ” бо ташаббуси Муассисаи давлатии “Осорхонаи миллӣ” баргузор гардид.

Бахтиёр Назарзода зимни суханронӣ зикр кард, ки Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар намоиши “Тоҷикистон-кишвари дарёҳои тиллоӣ” дар шаҳри Париж бо ифтихору шодмонӣ изҳор намуданд: “Бузургии силсила - чорабиниҳои фарҳангии дирӯзу имрӯз, аз ҷумла Намоишгоҳи “Тоҷикистон - кишвари дарёҳои тиллоӣ” дар маркази фарҳангии аврупоӣ - шаҳри Париж барои мо рӯйдоди муҳим ва хотирмон мебошад”.

Дар идома директори Муассисаи давлатии “Осорхонаи миллӣ” Зафаршо Иброҳимзода изҳор дошт, ки бо мақсади дар амал татбиқ намудани дастуру супоришҳои муҳтарам Эмомалӣ Раҳмон ҷиҳати ошно намудани қишрҳои гуногуни ҷомеа бо таъриху  фарҳанги пурғановати ниёгон, шакли хурди намоиши “Тоҷикистон – кишвари дарёҳои тиллоӣ”- ро бо тарзи намоишҳои сайёр баргузор намудем. 

Дар намоиш зиёда аз 100 ашёи таърихии марбут ба миллати тоҷик аз Муассисаи давлатии “Осорхонаи миллӣ” ба тамошо гузошта шуданд, ки онҳо инъикосгари таърихи куҳанбунёди халқи тоҷик буда, фарогири ҳазораи 4 то мелод ва давра ба давра то асри 10 мелодӣ мебошанд.

Ёдовар мешавем, ки намоиши нигораҳои таърихии Тоҷикистон зери унвони «Тоҷикистон – кишвари дарёҳои тиллоӣ» дар Осорхонаи ҳунарҳои осиёии «Гиме»-и шаҳри Париж 13 октябри соли 2021 бо иштироки Президенти Ҷумҳурии Тоҷикистон муҳтарам Эмомалӣ Раҳмон ва Президенти Ҷумҳурии Фаронса Эммануэл Макрон ба шарафи 30-солагии Истиқлоли давлатии Ҷумҳурии Тоҷикистон ва дар остонаи сиюмин солгарди муносибатҳои дипломатии Тоҷикистон ва Фаронса ифтитоҳ гардида, муддати 3 моҳ идома ёфт.

Зимнан, дар асоси дастури Пешвои миллат муҳтарам Эмомалӣ Раҳмон намоиши “Тоҷикистон – кишвари дарёҳои тиллоӣ” баъд аз бозгашт аз Фаронса 25 феврали соли 2022 дар Муассисаи давлатии “Осорхонаи миллӣ” ифтитоҳ гардид, ки то 25 августи соли ҷорӣ идома меёбад.

Намоиши “Тоҷикистон – кишвари дарёҳои тиллоӣ” дар Осорхонаи таърихӣ-кишваршиносии 2700-солагии Кӯлоб то 5 август идома ёфта, кормандони касбу кори гуногун ва сокинону меҳмонон бо осори гаронарзиши ба мерос гузоштаи ниёгон ва нақши халқи куҳанбунёду фарҳангсолори тоҷик дар рушди тамаддуни инсоният шинос мегарданд.

 

Шамсия НАВРӮЗОВА, мутахассиси пешбари бахши матбуоти МИҲД-и шаҳри Кӯлоб