29 июл дар шаҳри Тошкент нишасти навбатии Шурои вазирони корҳои хориҷии кишварҳои узви Созмони ҳамкории Шанхай баргузор гардид. Дар маросими ифтитоҳи нишаст Владимир Норов, иҷрокунандаи вазифаи вазири корҳои хориҷии Ҷумҳурии Ӯзбекистон, изҳор намуд, ки ҳамоиши вазирони корҳои хориҷӣ охирин марҳалаи омодагӣ барои нишасти сарварони давлатҳои СҲШ аст, ки 15 – 16 сентябр дар шаҳри Самарқанд баргузор мегардад.

 

 - Захираҳои ҳанӯз истифоданашудаи СҲШ-ро бояд амиқ таҳлил ва ба он нигоҳи тоза зам намуд. Самараноктарин роҳи татбиқи иқтидори бузурги Созмон ин пурзӯр намудани ҳамкориҳои воқеӣ дар соҳаҳои тиҷорат, нақлиёт, саноату технология, трансформатсияи рақамӣ, зеҳни сунъӣ, иқтисодиёти сабз мутобиқшавии иқлим мебошад. Ҳоло яке аз нуктаҳои муҳими мулоқоти вазирон баррасии дурнамои тавсеаи фаъолияти СҲШ мебошад. Аз ҷумла, мо дархости беш аз 10 давлатро, ки нияти дарёфти мақоми узви комилҳуқуқ, кишвари узв ва шарики муколамаи СҲШ баён кардаанд, баррасӣ хоҳем кард, - иброз намуд Владимир Норов.

Ба гуфтаи ӯ, сарфи назар аз мушкилоти пас аз пандемия ва шароити мураккаби байналмилалӣ, СҲШ ҳамчун як платформаи маъмул ва муассир барои иртибототи мустақим, нигоҳ доштани муколамаи байнидавлатӣ оид ба бисёр масъалаҳои муҳим боқӣ мондааст.

Муовини Сарвазир - вазири корҳои хориҷии Ҷумҳурии Қазоқистон Мухтор Тлеубердӣ, вазирони корҳои хориҷии Россия Сергей Лавров, Ҳиндустон Субраманян Ҷайшанкар, Ҷумҳурии Мардумии Чин Ван И, Қирғизистон Ҷиэнбек Кулубоев, Покистон Билавал Бҳутто Зардорӣ зимни суханронӣ талошҳои кишварашонро дар тавсеаи ҳамкориҳо дар доираи СҲШ изҳор карданд.

Сироҷиддин Муҳриддин, вазири корҳои хориҷии Ҷумҳурии Тоҷикистон, дар суханронӣ гуфт, ки аз барномаҳои ҳавасмандгардонии ҳамкории саноатӣ байни доираҳои соҳибкорӣ ва барномаҳои ҳамкорӣ дар соҳаи истифодаи манбаъҳои барқароршавандаи энергетикии ҷониби Ӯзбекистон истиқбол мекунад. - Мо бояд барои он талош намоем, ки СҲШ ба гунаи як Созмони бонуфуз ва барои минтақа манфиатнок боқӣ бимонад. Тавсеаи стратегияи калидии ҳамкориҳои ин Созмон, ки мо дар он шомилем, дар деклоратсияи Душанбе мавриди баррасӣ қарор гирифтааст, ки ба 20-умин солгарди он бахшида шуда буд. Дар нишасти Душанбе Президенти Ҷумҳурии Тоҷикистон муҳтарам Эмомалӣ Раҳмон таҳия ва қабули Стратегияи рушди иқтисодии минтақаи Созмони ҳамкории Шанхай то соли 2030-ро пешниҳод карда буданд. Он имкон фароҳам меоварад, ки дар ояндаи наздик мо лоиҳаи ин стратегияро барои баррасии кишварҳои узви Созмон пешниҳод кунем, - зикр кард Сироҷиддин Муҳриддин.

Дар поёни нишасти Тошкент иҷрокунандаи вазири корҳои хориҷии Ӯзбекистон Владимир Норов бо баргузории як брифинг оид ба натиҷаҳои он ба хабарнигорон маълумот дод.

 

Мирасрор АҲРОРОВ, “Ҷумҳурият”, шаҳри Тошкент