Вазири корҳои хориҷии мамлакат Сироҷиддин Муҳриддин бо роҳбари Гурӯҳи дӯстии байнипарлумонии Тоҷикистону Ҷопон Кейҷи Фуруя вохӯрд. Ҷонибҳо дастовардҳои сӣ соли равобити дипломатии ду кишварро таъкид намуда, саҳми Гурӯҳи дӯстии байнипарлумониро дар рушди ҳамкориҳо муҳим арзёбӣ намуданд. 

Маркази матбуоти Вазорат хабар дод, ки ҷонибҳо зарурати таҳкими минбаъдаи муносибатҳои ду кишварро дар бахшҳои иқтисодиву иҷтимоӣ, омодасозии кадрҳо ва робитаҳои илмию фарҳангӣ, беҳгардонии зерсохтори нақлиётию логистикӣ, татбиқи санадҳои қаблан имзошудаи ҳамкорӣ ва амалӣ кардани лоиҳаҳои муштарак таъкид доштанд.

 

 

 

Нақши Тоҷикистон дар мубориза бо  маводи нашъаовар муҳим арзёбӣ шуд

Дар доираи вохӯрӣ бо ҳайати Сохтори минтақавии зиддитеррористии Созмони ҳамкории Шанхай таҳти роҳбарии директори Кумитаи иҷроияи он Руслан Мирзаев, директори Агентии назорати маводи нашъаовари назди Президенти Ҷумҳурии Тоҷикистон Ҳабибулло Воҳидзода оид ба ташаббусҳои кишвар вобаста ба пешгирии ин зуҳуроти номатлуб ва фаъолияти мақомоти ҳифзи ҳуқуқ дар самти мусодираи маводи мухаддир маълумод дод.

Ба иттилои Агентӣ, Руслан Мирзаев нақши Тоҷикистонро дар мубориза бо муомилоти ғайриқонунии маводи нашъаовар дар минтақа муҳим арзёбӣ карда, таъкид дошт, ки саҳми Агентӣ дар ин ҷода пурсамару ҳадафрас аст. Инчунин, ташаббуси Тоҷикистон дар хусуси таъсиси Маркази зиддимухаддиротии СҲШ дар шаҳри Душанбе муҳим дониста шуд.

 

 

 

Мулоқот бо намояндагони Бонки ҷаҳонӣ

Дар мулоқоти раиси Кумитаи ҳолатҳои фавқулода ва мудофиаи гражданӣ Рустам Назарзода бо намояндагони Бонки ҷаҳонӣ бо сарварии сармутахассис оид ба идораи ҳолатҳои буҳронӣ ва офатҳои табиӣ дар сатҳи меъёрҳои байналмилалӣ Адолфо Симаз масъалаҳои идомаи сохтмони Маркази миллии таълимӣ барои омода намудани наҷотдиҳандагон, бунёди марказҳои тайёр кардани ғаввосон, кинологӣ ва идораи ҳолатҳои буҳронӣ дар дастгоҳи марказӣ ва оғози сохтмони ин марказ дар ноҳияҳо мавриди баррасӣ қарор гирифтанд.

Ба иттилои шуъбаи робита бо ҷомеаи Кумита, Адолфо Симаз зикр кард, ки ниҳод дар пешгирӣ ва бартарафсозии оқибатҳои офатҳои табиӣ корҳои самарабахшро анҷом додааст. Ӯ ба рушди минбаъдаи ҳамкориҳо изҳори умед кард. 

 

 

 

Ярмаркаи фурӯши либос ва лавозимоти мактабӣ

Мувофиқи қарори раиси шаҳри Душанбе ва бо мақсади дастрасии аҳолӣ ба либос ва лавозимоти мактабӣ, аз 1 то 31 август дар ҷойҳои муайяншуда, аз ҷумла назди Маркази савдои «Панҷшер», ярмаркаи фурӯши либос ва лавозимоти мактабӣ ҷараён мегирад. 

Бино ба хабари шуъбаи иттилооти дастгоҳи раиси шаҳр, дар он аз ҷониби қариб 20 корхонаву коргоҳҳои истеҳсолии пойтахт ва соҳибкорони ватанӣ намудҳои муайяни сарулибос ва лавозимоти мактабӣ пешниҳод мегарданд. 

Дар ҳамин ҳол АМИТ «Ховар» хабар дод, ки ярмаркаҳо дар чор ноҳияи пойтахт, аз ҷумла дар ҶДММ МС «Истиқлол», ҶСП «Гулистони Душанбе» ва ҶДММ «Варзоб Т.Ҷ.»-и ноҳияи Исмоили Сомонӣ, кӯчаи Валаматзода 8, (назди бинои МИҲД Шоҳмансур), назди МС «Садбарг» ва «Шукрона», МС «Ховарон»-и ноҳияи Шоҳмансур, ҶДММ бозори «Корвон», ҶДММ ИИ «Нассоҷии Тоҷик», Маркази савдои «Ганҷина»-и ноҳияи Фирдавсӣ ва дар дохили ҶДММ «Сафариён»-и ноҳияи Сино, доир мегарданд.

 

 

 

доираҳои соҳибкории Суғд ва Красноярск

Дар доираи сафари соҳибкорони вилояти Красноярск ба вилояти Суғд, бо ташаббуси Палатаи савдо ва саноати вилояти Суғд ва Палатаи савдо ва саноати Сибири Марказӣ дар шаҳри Хуҷанд вохӯрии доираҳои тиҷоратии ду вилоят баргузор гардид,- хабар дод хадамоти матбуоти раиси вилояти Суғд.

Дар мулоқот аз вилояти Красноярск роҳбарони шонздаҳ корхонаи истеҳсолӣ бо роҳбарии ноиби президенти Палатаи савдо ва саноати Сибири Марказӣ Даря Ковалева ва роҳбарони панҷоҳ корхонаи истеҳсолӣ ва соҳибкорони вилояти Суғд, инчунин, аъзои Палатаи савдо ва саноати Ҷумҳурии Тоҷикистон иштирок намуданд.

Таъкид гардид, ки маҳсулоти тару тозаи Тоҷикистон дар Россия серхаридоранд ва доираҳои соҳибкории ҳар ду минтақа метавонанд барои содироти маҳсулоти пахтагӣ, меваи хушку тар, консерв ва обҳои нӯшокӣ тарҳҳои навро амалӣ созанд. Вилояти Суғд бошад барои воридсозии чӯбу тахта, ғалла ва дигар маҳсулот ҳавасманд аст.