Таҳти раёсати Ӯзбекистон дар шаҳри Тошкент Анҷумани роҳбарони воҳидҳои маъмурӣ-ҳудудии кишварҳои узви СҲШ баргузор гардид. Аз Тоҷикистон Шарифҷон Ҷумъазода, раиси Кумитаи рушди маҳали назди Президенти Ҷумҳурии Тоҷикистон ва Умедҷон Нозирзода, муовини раиси Вилояти Мухтори Кӯҳистони Бадахшон, ширкат карданд. Анҷуманро ноиби Сарвазир– вазири сармоягузорӣ ва тиҷорати берунаи Ӯзбекистон Ҷамшед Хоҷаев ифтитоҳ бахшид.

 

- Имрӯз замони бесуботӣ, зудтағйирёбандаи ҷаҳонӣ ва чолишҳову озмоишҳост. Дар назди мо як қатор вазифаҳои ҷиддӣ истодаанд, ки бояд ҷиҳати ҳаллу фасли онҳо ҳамчун қувваи пешбаранда саҳми худро гузорем. Маҳз барои ҳамин ҳадафи асосии анҷумани мо таҳкими ҳамаҷонибаи ҳамкориҳои байниминтақавӣ дар бахшҳои тиҷоратию иқтисодӣ, сармоягузорӣ, фарҳангию гуманитарӣ ва самтҳои дигари афзалиятнок мебошад, - изҳор намуд Ҷамшед Хоҷаев.

Вай афзуд, ки барои боз ҳам амиқтар гардондани ҳамкориҳои бисёрҷониба муҳим аст, ки кушиши муштаракамонро ба самтҳои афзалиятнок равона созем ва он ҳам якум ҳавасмандгардонии ҳамкориҳои тиҷоративу иқтисодӣ ва сармоягузорӣ, дуюм, фаъолсозии ҳамкорӣ дар соҳаи таъмини хӯрокворӣ ва кишоварзӣ ва сеюм, туризм мебошад.

Шарифҷон Ҷумъазода гуфт, ки фаъолияти СҲШ ба принсипҳои асосии стратегияи сиёсати хориҷии давлати мо комилан мувофиқ аст. Тоҷикистон ба таҳкими минбаъдаи нақши Созмон дар ҳалли вазифаҳои таҳкими сулҳу амният, густариши робитаҳои тиҷоратию иқтисодӣ, фарҳангӣ ва гуманитарӣ манфиатдор аст. 

-Танҳо дар нимсолаи аввали соли ҷорӣ ҳаҷми гардиши савдои хориҷии Тоҷикистон дар доираи Созмон қариб 2,4 миллиард доллари ИМА-ро ташкил дод, ки нисбат ба ҳамин давраи соли 2021-ум 37 дарсад зиёд буда, ҳаҷми умумии муомилоти савдои берунии ҷумҳурии мо, дар маҷмуъ, қариб 65 дарсадро ташкил дод, - гуфт Шарифҷон Ҷумъазода.  

Таъкид шуд, ки дар рушди босуръати иқтисоди Тоҷикистон сармояи хориҷӣ мавқеи муҳимро ишғол мекунад ва ҳиссаи асосии он ба кишварҳои узви Созмон рост меояд. Тайи понздаҳ соли ахир аз кишварҳои узви Созмон ба иқтисоди Тоҷикистон ҳудуди 6 миллиард доллар сармоягузорӣ шудааст, ки беш аз 3 миллиарди онро сармоягузории мустақим ташкил медиҳад. Он барои рушди саноати кӯҳӣ, металлургияи ранга, мошинсозӣ, комплекси агросаноатӣ, энергетика, саноати сабук, нақлиёт ва коммуникатсия мусоидат кардааст.

- Мо ҳанӯз аз ҳамаи имкониятҳо дуруст ифтифода набурдаем. Ин дар ҳолест, ки алоқаҳои бевоситаи ниҳодҳои роҳбарикунандаи вилоятҳо ва корхонаҳои мамлакатҳои иштироккунанда беш аз пеш мустаҳкам мешавад, таҳия ва татбиқи лоиҳаҳои муштарак осон мегардад, монеаҳои сунъии тараққиёти иқтисодиёт бартараф мегарданд. Анҷуман бояд ба ин аз ҳар равзана ёрӣ расонад,- гуфт раиси Кумитаи рушди маҳали назди Президенти Ҷумҳурии Тоҷикистон.

Шарифҷон Ҷумъазода, инчунин, илова кард: “Мавқеи ҷуғрофии Тоҷикистон барои соҳаи сайёҳӣ, коркарди захираҳои табиӣ ва, албатта, истеҳсоли маҳсулоти аз ҷиҳати экологӣ тозаи кишоварзӣ ва маҳсулоте, ки метавонад барои вусъати хамкорӣ ҳамчун асос хизмат кунад, имкониятҳои доманфарохеро дар худ гунҷоиш медиҳад. Тоҷикистон соҳиби конҳои бойи канданиҳои фоиданоки зеризаминӣ мебошад. Ман бовар дорам, ки мо дар ҳамкориҳои густарда ба баланд шудани дараҷаи ҳамкориҳои саноатӣ низ ноил хоҳем шуд”. 

 

Мирасрор АҲРОРОВ, 

“Ҷумҳурият”, шаҳри Тошкент