Хабарҳо
Тоҷикистон ҷонибдори тамомияти арзии Чин мебошад
Вазорати корҳои хориҷии Ҷумҳурии Тоҷикистон роҷеъ ба «масъалаи Тайван» хабар дод, ки Тоҷикистон мувофиқи меъёр ва принсипҳои аз ҷониби умум эътирофшуда ва ҳуқуқи байналмилалӣ ҷонибдори тамомияти арзии Ҷумҳурии Мардумии Чин мебошад.
Дар изҳороти Вазорат омадааст: “Мавқеи Ҷумҳурии Тоҷикистон нисбат ба Тайван бетағйир боқӣ мемонад. Мо ҷонибдори сиёсати «Чини ягона» ҳастем ва мавқеи мо дар тамоми ҳуҷҷатҳои расмии бунёдии Тоҷикистону Чин баён гардида, Ҳукумати Ҷумҳурии Мардумии Чинро, ки аз тамоми Чин намояндагӣ мекунад, ягона ҳукумати қонунӣ эътироф мекунем”.
Имзои созишномаҳои ҳамкорӣ миёни соҳибкорони Суғд ва Красноярск
Раиси вилояти Суғд Раҷаббой Аҳмадзода бо гурӯҳи соҳибкорони кишвари Красноярски Федератсияи Россия мулоқот намуд. Соҳибкорони Красноярск бо роҳбарии ноиби президенти Палатаи савдо ва саноати Сибири Марказӣ Даря Ковалёва дар вилояти Суғд бо фаъолияти як қатор корхонаҳои саноатӣ шинос шуда, аз минтақаҳои сайёҳии вилоят боздид намуданд ва бо шароиту имконоти онҳо ошно гардиданд.
Зимни мулоқот раиси вилоят таъкид кард, ки туфайли сиёсати пешгирифтаи роҳбарони Тоҷикистону Россия ҳамкориҳои мутақобилан судманди тиҷоратию иқтисодӣ миёни минтақаҳои ду кишвар дар ҳоли рушданд.
Миёни Палатаи савдо ва саноати вилояти Суғд ва Агентии «Статус»-и Красноярск, Ассотсиатсияи соҳибкорони вилояти Суғд ва Иттифоқи соҳибкорони Красноярск, ширкатҳои «САМО» ва «Алянс Строй», «САМО» ва «Энергия», «МИН» ва «Селена фарм», «АгроБиоХим» ва «СИВЕР», ширкати нақлиётии «АВВАТ» ва «Железнодорожное снабжение» ва ғайраҳо созишномаҳои ҳамкорӣ ба имзо расиданд.
“Фазои мусоиди сармоягузории Ҷумҳурии Тоҷикистон”
Дар Батуми таҳти ҳамин унвон бо ташаббуси Сафорати Ҷумҳурии Тоҷикистон дар Гурҷистон ва дастгирии Консули фахрии Тоҷикистон дар шаҳри Батуми бо иштироки доираи тоҷирону сармоягузорони маҳалливу хориҷӣ ва ширкатҳои давлативу хусусии Гурҷистон ҳамоиши соҳибкорӣ баргузор гардид.
Тибқи иттилои Вазорати корҳои хориҷӣ, ба ҳамаи иштирокчиён оид ба имкониятҳои фарохи сармоягузорӣ ба бахшҳои гуногуни иқтисоди Тоҷикистон, аз ҷумла гидроэнергетика, саноат, истихроҷ ва коркарди маъданҳои кӯҳӣ, истеҳсолу содироти маҳсулоти кишоварзӣ, бунёди инфрасохтори сайёҳӣ ва нақлиёт, ки барои кишвари мо афзалиятноканд, маълумоти муфассал дода шуд.
Ҳушдор! То 8 август омадани сел дар назар аст
Кумитаи ҳолатҳои фавқулода ва мудофиаи граждании мамлакат бо истинод ба маълумоти Агентии ҳавошиносӣ, хабар медиҳад, ки аз 4 то 8 августи соли равон дар ноҳияҳои кӯҳӣ ва наздикӯҳии мамлакат, ба истиснои қисмати шарқии Вилояти Мухтори Кӯҳистони Бадахшон, бар асари об шудани пиряхҳо омадани сел пешбинӣ мешавад.
Аз ин рӯ, Кумита аз сокинони кишвар хоҳиш мекунад, ки барои зарари сел нарасидан ба манзилҳои истиқомативу заминҳои кишт, тамоми тадбирҳои зарурӣ андешида шаванд.
Баёни ақида (0) Санаи нашр: №: Мутолиа карданд: 6126