иҷтимоиёт
СЕ МУШКИЛ АГАР БАРТАРАФ ШАВАД...
БА «ҶУМҲУРИЯТ» ҶАВОБ ОМАД
Вазорати тандурустӣ ва ҳифзи иҷтимоии аҳолии Ҷумҳурии Тоҷикистон барои ҳамкориҳои судманд бо Нашрияи расмии Ҷумҳурии Тоҷикистон – рӯзномаи «Ҷумҳурият» доир ба инъикоси масъалаҳои вазъи солимии аҳолӣ, дастоварду мушкилоти соҳа ва тарғиби тарзи ҳаёти солим миннатдорӣ баён менамояд. Аз ҷумла, Вазорат мақолаи дар рӯзнома нашргардида зери унвони «Се мушкил агар бартараф шавад...»-ро аз 14 июни соли 2022, № 115, мавриди баррасӣ қарор дод.
Дар матлаб ҳолати техникии бинои Маркази назорати давлатии санитарию эпидемиологии ноҳияи Рашт ва масъалаи норасоии мутахассисону набудани озмоишгоҳи замонавӣ дар он мавриди таҳлилӣ қарор гирифтааст. Ҳангоми суҳбат бо иҷрокунандаи вазифаи директори маркази зикршуда Х. Ҳомидов муайян шуд, ки муаллифи навиштаи мазкур Худодод Зайниддин дар хусуси масъалаи мазкур бо ӯ ҳамсуҳбат нагардидааст. Маълумоти дар мақола дарҷшуда ба кадом замон мансуб аст, номуайян боқӣ мемонанд.
Аз ин рӯ, хоҳишмандем, ки дар ҷаласаҳои кории идора дар байни кормандони нашрия оид ба риояи этикаи касбӣ корҳои фаҳмондадиҳӣ гузаронда шаванд. Баробари ин, хуб мешуд, ки хабарнигорон пеш аз нашри матлаби омоданамудаашон аз роҳбарони муассисаю ташкилотҳо такроран дурустии маълумотро санҷида, сипас онро ба табъ расонанд.
Тибқи маълумот, ҳоло дар бинои Маркази назорати давлатии санитарию эпидемиологии номбурда корҳои таъмири озмоишгоҳ дар арафаи анҷомёбӣ буда, бо ҷалби шарикони рушд маҷмуи таҷҳизоти озмоишгоҳи вирусологӣ дастрасу насб хоҳанд шуд. Мутахассисони ба кор дар ин самт ҷалбшаванда низ бо омӯзиши зарурии тахассусӣ фаро гирифта мешаванд.
А. АМИРЗОДА,
муовини вазири тандурустӣ ва ҳифзи иҷтимоии аҳолии
Ҷумҳурии Тоҷикистон
Баёни ақида (0) Санаи нашр: 08.08.2022 №: 152 Мутолиа карданд: 386