иҷтимоиёт
“ҶУМҲУРИЯТ” ВОКУНИШИ ВАЗОРАТРО ТАҲҚИҚ НАМУД
Барои дақиқ намудани ваҷҳҳои дар ҷавоби Вазорати тандурустӣ ва ҳифзи иҷтимоии аҳолӣ ба унвони рӯзнома зикрёфта, хабарнигорони рӯзнома ба ноҳияи Рашт сафари корӣ анҷом доданд ва бо ҳолати воқеии Маркази назорати давлатии санитарию эпидемиологӣ аз наздик шинос шуданд.
Ҳарчанд А. Амирзода, муовини вазири тандурустӣ ва ҳифзи иҷтимоӣ, зимни вокуниш ба матлаби хабарнигори рӯзнома Худодод Зайниддин “Се мушкил агар бартараф шавад...” (“Ҷумҳурият”, №115, 14 июни соли равон), аз корҳои таъмиру сохтмонӣ ҳарф мезанад, он ҷо ҳеҷ коре ба ин монанд мушоҳида намешавад. Дар мақолаи корманди рӯзнома, пеш аз ҳама, дар бораи фарсудагии бино, набудани озмоишгоҳи замонавӣ ва норасоии мутахассисон сухан меравад. Ӯ маълумоти мазкурро дар асоси ҳисоботи семоҳаи аввали директори Марказ дарҷ намудааст. Тавре зимни боздид мушоҳида намудем, воқеан чунин озмоишгоҳ дар Маркази номбурда вуҷуд надорад. Марказ дар бинои куҳнаи фарсуда ва беозмоишгоҳу номуҷаҳҳаз фаъолият мебарад ва аз мутахассисони сироятшинос танқисӣ мекашад. Дар он қитъаи замине, ки барои бунёди бинои нави Марказ пешбинӣ шудааст, донаи хиште ба чашм намехӯрад, ҷуз чанд ниҳолу сабзазор.
Ҳангоми вориди ҳавлии Маркази номбурда шудани мо иҷрокунандаи вазифаи директори он Хушнуд Ҳомидов аз суҳбат худдорӣ намуд. Маълум, ки ӯро аз ҳамкориҳои қаблиаш бо нашрия касе пушаймон кардааст. Баъдан, номбурда фақат ҳамон суханони муовини вазирро қориазёд такрор намуд: “Таъмир рафта истодааст”, “Таҷҳизот меорем”... Аммо вақте аз ӯ пурсидем, ки чӣ гуна таъмир, танҳо ба мо корҳои рангубори бинову дохили онро мисол овард. Дар мавриди таҷҳизот низ фақат аз ҳамкорӣ бо шарикони рушд гуфт, вале номаълум кадом шарикон ва дар доираи чӣ гуна лоиҳа?! Дар вокуниши Вазорат ба матлаби хабарнигор низ аз шарикони рушд ё лоиҳаи сармоягузорӣ мушаххас ном гирифта нашудааст, ки воқеияти мушкилоти дар мақола матраҳшударо бозгӯ мекунад.
Дар ниҳоят Раҳимҷон Муқимӣ, раиси ноҳияи Рашт, ваъда дод, ки Мақомоти иҷроияи маҳаллии ҳокимияти давлатии ноҳия якҷо бо Вазорати тандурустӣ ва ҳифзи иҷтимоии аҳолии ҷумҳурӣ дар ҳамкорӣ бо шарикони рушду соҳибкорони ватандӯсти маҳаллӣ масъалаи сохтмони бино бо озмоишгоҳу таҷҳизоти навинро дар ояндаи наздик ҳал хоҳад намуд. Умед дорем, ки роҳбарияти Хадамоти назорати давлатии санитарию эпидемиологӣ низ дар ин маврид чораҳои амалӣ меандешад. Ҳадди ақал бо вазъи Маркази номбурда аз наздик шиносоӣ пайдо мекунад ва ҳангоми посух ба рӯзнома аз натиҷаҳои мушаххас мисол меорад.
Ташрифулло САЪДУЛЛОЕВ,
Комрон САФАР, “Ҷумҳурият”,
Душанбе – Рашт – Душанбе
Баёни ақида (0) Санаи нашр: 08.08.2022 №: 152 Мутолиа карданд: 621