Хабарҳо
ВАРЗИШ
ТЕННИС
Ҷоми Президенти Тоҷикистонро киҳо гирифтанд?
Бо ширкати варзишгарони Қазоқистон, Қирғизистон, Покистон, Россия, Тоҷикистон, Шведсия ва Ӯзбекистон XII мусобиқаи байналмилалӣ оид ба теннис миёни наврасони то 16 - сола барои дарёфти Ҷоми Президенти Ҷумҳурии Тоҷикистон (1 – 6 август, Душанбе) баргузор гардид.
Бино ба иттилои Федератсияи тенниси кишвар, ҷойҳои якуму дуюм ва сеюмро мутаносибан Сомон Амонов, Фарҳод Ғайратзода (Тоҷикистон) ва Муҳаммад Алӣ Ризвон Ҳайдар (Покистон) гирифтанд.
Миёни духтарон бошад, Данаия Амангажиева, София Сафиулина (Қазоқистон) ва Аниса Яҳёева (Тоҷикистон) мақомҳои ифтихориро ба даст оварданд.
Дар сабқати ҷуфти писарон Сомон Амонов ва Муҳаммад Алӣ Ризвон Ҳайдар ғолиб шуданд.
Миёни духтарон Данаия Амангажиева ва София Сафиулина ҷойи аввалро гирифтанд.
ЧЕМПИОНАТИ ОСИЁ
Се медали ҷудочиёни тоҷик
Гӯштигири маъруфи кишвар Темур Раҳимов (+100 кг) дар Чемпионати Осиё оид ба ҷудо миёни калонсолон (4 – 7 август, Нур-Султон, Қазоқистон) ба гирифтани нишони нуқра даст ёфт.
Паҳлавони сангинвазни мо баъд аз шикаст додани Бекмурод Олтибоев ва Шоҳрух Бахтиёров (Ӯзбекистон) ба финал баромад. Дар вохӯрии ҳалкунанда Темур аз ҷудокори ҷопонӣ – Кокоро Кагуера шикаст хӯрд.
Дар чемпионати қора ду варзишгари дигари кишвар Шодмон Ризоев ва Сомон Маҳмадбеков (-81) медалҳои нуқраю биринҷӣ ба даст оварданд.
ҶОМИ ТОҶИКИСТОН – 2022
Ҷуфтҳои даври 1/4 финал муайян шуданд
Дастаҳои «Истиқлол», «Равшан-К», «Эсхата», КМВА, «Саройкамар», «Хатлон», «Кӯктош» баъд аз шикаст додани ҳарифонашон ба даври 1/4 ниҳоии Ҷоми Тоҷикистон – 2022 роҳ ёфтанд.
Дар ин давр «Истиқлол» бо «Равшан-К», «Эсхата» бо КМВА, «Саройкамар» бо «Хатлон», «Динамо»/«Файзканд» бо «Кӯктош» неру месанҷанд.
Маҳмуд БАҲРОМ, шореҳи варзиш
Баёни ақида (0) Санаи нашр: №: Мутолиа карданд: 7401