Хабарҳо
НИШАСТИ МАТБУОТӢ
СОХТМОНИ РОҲУ НАҚБҲО ТАВСЕА МЕЁБАД
- Дар нимсолаи аввали соли равон тавассути нақлиёти кишвар 47,1 миллион тонна бор ва 407 миллион мусофир интиқол дода шудааст, ки назар ба ҳамин давраи соли гузашта боркашонӣ 18,7 ва мусофиркашонӣ 11,1 дарсад афзудааст. Қариб 35 дарсади интиқоли бор ва 92,6 дарсади мусофирбарӣ ба нақлиёти автомобилгард рост меояд. Афзоиши гардиши боркашонӣ ва мусофирбарӣ аз рушди инфрасохтори роҳу нақлиёт, бахусус беҳбуд ёфтани сифати роҳҳо, дарак медиҳад, - гуфт Азим Иброҳим, вазири нақлиёт, дар нишасти матбуотӣ.
Вазири нақлиёт дар самти сохтмони роҳу нақбҳо ба суоли хабарнигори рӯзнома посух дод, ки дар ин самт амалисозии 11 лоиҳаи сармоягузорӣ ба маблағи 10,4 миллиард сомонӣ ҷараён дорад. Аз ин татбиқи 5 лоиҳа ба маблағи 4,9 миллиард сомонӣ пурра анҷом ёфтааст. Тибқи дастури Президенти мамлакат муҳтарам Эмомалӣ Раҳмон то Ҷашни 35-солагии Истиқлоли давлатӣ бунёди 1000 километр роҳи баландсифати стандарти ҷаҳонӣ нақшабандӣ гардидааст. Оғози корҳои сохтмонӣ дар қитъаи роҳи Душанбе – Қулма, қитъаи Қалъаихум – Ванҷ – сарҳади маъмурии ноҳияи Рӯшон аз ин зумраанд.
Ташрифулло САЪДУЛЛОЕВ, “Ҷумҳурият”
МАВОДИ НАШЪАОВАР
ҶИНОЯТ КАМ - МУСОДИРА ЗИЁД
Баъди ба сари қудрат омадани «Толибон» (моҳи августи соли 2021), то моҳи июли соли равон дар ноҳияҳои наздисарҳадии Тоҷикистон бо Афғонистон беш аз се тонна маводи нашъаовар мусодира шудааст. Ин дар ҳолест, ки соли 2020 ҳаҷми маводи нашъаовари мусодирагардида дар ноҳияҳои наздисарҳадӣ 1 тоннаю 185 килограммро ташкил дода буд.
Ин нуктаро директори Агентии назорати давлатии маводи нашъаовари назди Президенти Ҷумҳурии Тоҷикистон Ҳабибулло Воҳидзода зимни нишасти матбуотӣ иброз дошт.
Дар ҷумҳурӣ 384 ҷиноят вобаста ба маводи нашъаовар сабт шудааст, ки дар қиёс ба ҳамин давраи як соли пеш 62 ҳолат кам мебошад. Новобаста ба ин, аз муомилоти ғайриқонунӣ 2 тоннаю 578 килограмм маводи мухаддир мусодира шудааст, ки нисбат ба ҳамин давраи соли гузашта 882 килограмм зиёд мебошад.
Тибқи омори расмӣ, нимсолаи якум дар кишвар теъдоди нашъамандон ба 4437 баробар шуда, 11 дарсад коҳиш ёфтааст.
Маҳмуд МИРЗОЁН, «Ҷумҳурият»
Баёни ақида (0) Санаи нашр: №: Мутолиа карданд: 8174