Хабарҳо
ВАРЗИШ
ЧЕМПИОНАТИ САFA
Тоҷикистон дар садри ҷадвал
Мунтахаби ҷавонони Тоҷикистон дар даври сеюми Чемпионати Ассотсиатсияи футболи Осиёи Марказӣ (U-19) тими Қирғизистонро бо ҳисоби 3:1 мағлуб намуд.
Голҳои Асадбек Ҷӯрабекзода, Салам Ашурмамадов ва Сунатулло Азизов ғалабаи мунтахаби моро таъмин карданд.
Ёдовар мешавем, ки дар бозии аввал ҷавонони тоҷик тими Афғонистонро бо натиҷаи 4:1 шикаст дода буданд.
Пас аз се давр Тоҷикистон бо 6 хол дар садри ҷадвал қарор дорад.
ҶУДО
Гӯштигирони ҷавони тоҷик ба Чемпионати ҷаҳон мераванд
Бино ба иттилои Федератсияи ҷудои кишвар, паҳлавонони тоҷик Абубакр Шеров, Нуралӣ Эмомалӣ (-66кг), Масъуди Аҳмадзод (-73кг), Суннатулло Лоиқов, Муҳаммадҷон Абдуҷалилов (-81кг), Эмомризо Анварзода (-100кг) ва Мансур Раҳмон (+100кг) дар Чемпионати ҷаҳон миёни ҷавонон (10 – 13 август, Гуаякил, Эквадор) ширкат мекунанд.
Федератсияи байналмилалии ҷудо хабар медиҳад, ки дар чемпионат 389 варзишгар (218 писар, 171 духтар) аз 65 давлат сабти ном шудаанд.
Ба ғолибону ҷоизадорон дар баробари медал ҷоизапулӣ тақдим мегардад. Ғолибони ҳамаи вазнҳо бо 2500 доллари ИМА, барандагони медалҳои нуқраю биринҷӣ мутаносибан 1500 ва 850 доллар мегиранд.
ҶОМИ ГАМПЕР
«Барселона» бори 45-ум онро соҳиб гардид
Дастаи «Барселона» (Испания) дар бозӣ барои Ҷоми Гампер ба дарвозаи «Пумас» (Мексика) шаш голи беҷавоб зада, маротибаи 45-ум соҳиби ин ҷоиза шуд.
Тӯбҳоро Роберт Левандовски, Педри (ду гол), Дембеле, Обамеянг ва Френки де Йонг ба самар расонданд.
Маҳмуд БАҲРОМ, шореҳи варзиш
Баёни ақида (0) Санаи нашр: №: Мутолиа карданд: 8226