Хабарҳо
ИФТИТОҲИ КОНСУЛГАРИИ ФАХРИИ ТОҶИКИСТОН ДАР БАТУМИ
Дар шаҳри Батуми бахшида ба 28-умин солгарди барқарории муносибатҳои дипломатӣ байни Тоҷикистону Гурҷистон маросими ифтитоҳи дафтари Консули фахрии Ҷумҳурии Тоҷикистон дар шаҳри Батумии Ҷумҳурии Мухтори Адҷария баргузор гардид.
Тибқи иттилои Вазорати корҳои хориҷӣ, раиси Ҳукумати Ҷумҳурии Мухтори Адҷария Торнике Рижвадзе ба ҷониби Тоҷикистон барои тасмими ифтитоҳи Консулгарии фахрӣ дар Батуми изҳори сипос намуда, таъкид кард, ки ниҳод дар тавсеаи ҳамкориҳои иқтисодӣ, ҷалби сармоя, рушди сайёҳӣ ва табодули фарҳангӣ саҳми арзанда хоҳад гузошт.
НАМОИШИ «ТОҶИКИСТОН – КИШВАРИ ДАРЁҲОИ ТИЛЛОӢ» ДАР ДАНҒАРА
Дар Осорхона-мамнуъгоҳи ҷумҳуриявии ноҳияи Данғара бо иштироки муовинони раиси ноҳия ва директори Осорхонаи миллӣ Зафаршо Иброҳимзода шакли хурди намоиши сайёри «Тоҷикистон – кишвари дарёҳои тиллоӣ» ифтитоҳ ёфт,- хабар доданд аз Осорхонаи миллӣ.
Директори Осорхонаи миллӣ зикр намуд, ки намоиши «Тоҷикистон – кишвари дарёҳои тиллоӣ» баҳри шинос намудани қишрҳои гуногуни ҷомеа бо осори ниёгон ва баланд бардоштани ҳисси худшиносиву ватандӯстии онҳо нақши муассир дорад. Зеро вақте мардум худшиносу худогоҳ бошанду асли худро донанд, пас миллат побарҷову ваҳдати он комил боқӣ хоҳад монд.
Дар намоиш аз фонди Осорхонаи миллӣ зиёда аз 100 ашёи таърихӣ ба тамошо гузошта шудааст, ки онҳо инъикосгари таърихи куҳанбунёди халқи тоҷиканд.
ТАҚДИМИ 100 АРОБАЧАИ МАЪЮБӢ БА ЭҲТИЁҶМАНДОН
Дар Маркази минтақавии хизматрасонии иҷтимоӣ ба пиронсолон ва маъюбон дар шаҳри Хуҷанд бо иштироки намояндаи Ҳукумати Ҷумҳурии Тоҷикистон оид ба корҳои ободонию созандагӣ ба истиқболи 35-солагии Истиқлоли давлатӣ вазири тандурустӣ ва ҳифзи иҷтимоии аҳолӣ Ҷамолиддин Абдуллозода ва дигар шахсони расмӣ маросими супурдани 100 аробачаи маъюбӣ, либос, маводи хӯрока ба ниёзмандон баргузор гардид.
Ҷамолиддин Абдуллозода зикр дошт, ки дар Тоҷикистон барои шахсони эҳтиёҷманд дар тамоми соҳаҳо имконияти мусоиди кору зиндагӣ фароҳам оварда шудааст.
Ба маъюбон дар муассисаҳои давлатии тиббию иҷтимоӣ бо тартиби муқаррарнамудаи қонунгузорӣ ба таври ройгон ё имтиёзнок ёрии тиббӣ расонда мешавад. Кӯдакони маъюб дар муассисаҳои таҳсилоти миёнаи умумӣ ҳангоми зарурат бо воситаҳои махсуси техникӣ таъмин мегарданд. Инчунин, дар муассисаҳои махсуси таълимӣ кӯдакони имконияташон маҳдуд машғули таҳсиланд.
Иттилоъ дода шуд, ки ҳамасола ба оилаҳои камбизоат, осебпазир, маъюбон аз буҷети мамлакат беш аз 116 миллион сомонӣ, аз ҷумла 30, 9 миллион сомонӣ кумакпулӣ, равона мешавад.
ФОРУМИ БАЙНАЛМИЛАЛИИ «ПОМИР ИНВЕСТ – 2022» ДОИР МЕГАРДАД
Мақомоти иҷроияи ҳокимияти давлатии Вилояти Мухтори Кӯҳистони Бадахшон хабар дод, ки 17 – 18 августи соли равон дар шаҳри Хоруғ бо иштироки сармоягузорони дохиливу хориҷӣ, шарикони рушд, соҳибкорон ва ҳамватанони бурунмарзӣ Форуми байналмилалии «Помир Инвест – 2022» баргузор мегардад.
Ин иқдом дар доираи ташаббусҳои созандаи Президенти мамлакат муҳтарам Эмомалӣ Раҳмон ва сиёсати дарҳои кушодаи Ҳукумати Ҷумҳурии Тоҷикистон доир шуда, дар он лоиҳаҳои бахшҳои саноати сабук ва кӯҳӣ, истеҳсоли маҳсулоти хӯрокворӣ, имкониятҳои сайёҳӣ ва фарҳангӣ муаррифӣ гардида, заминаи хубро барои сармоягузориҳои нав хоҳанд гузошт.
Баёни ақида (0) Санаи нашр: №: Мутолиа карданд: 7823