Таъсиси Донишгоҳи давлатии тиббии Хатлон, ки онро метавон иқдоми наҷибу мондагор, ояндабинонаву хирадмандона ва ғамхорӣ ба халқу миллат номид, тадбири саривақтии Асосгузори сулҳу ваҳдати миллӣ - 

Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон мебошад.

Он ба хотири қонеъ гардондани талаботи ҷомеа, рушду густариши минбаъдаи соҳаи ҳаётан муҳими тандурустӣ, беҳтар гардондани ҳифзи иҷтимоии аҳолии кишвар, омода ва тайёр кардани мутахассисони баландихтисоси дар арсаи ҷаҳонӣ рақобатпазир роҳандозӣ гардидааст. ДДТХ таҳти роҳбарии доктори илмҳои тиб, профессор, ҷарроҳи дараҷаи олӣ Убайдулло Қурбон фаъолият дорад. То имрӯз теъдоди умумии донишҷӯён ба 2209 нафар расидааст. Аз ин шумора донишҷӯёни факултети тиббӣ 1026 нафар, педиатрӣ 838 нафар ва стоматологӣ 341 нафарро ташкил медиҳанд.  

Имсол дар таърихи Донишгоҳ аввалин маротиба хатми донишҷӯён сурат гирифт. Аз 336 хатмкунандаи ихтисосҳои кори табобатӣ, педиатрия ва стоматология  46 нафар соҳиби дипломи аъло гардид. 17-уми июни соли ҷорӣ бо иштироки Президенти Ҷумҳурии Тоҷикистон муҳтарам Эмомалӣ Раҳмон бинои хобгоҳи донишҷӯён мавриди баҳрабардорӣ қарор гирифт. Бино аз 9 ошёна иборат буда, дорои 800 ҷои хоб, ошхона, толорҳои хониш, фароғатӣ ва варзишӣ мебошад. Лозим ба ёдоварист, ки дар Донишгоҳ аввалин маротиба дар байни муассисаҳои олии касбии ҷумҳурӣ ҷамъияти илмӣ – маърифатии «Дониш» таъсис дода шуд, ки мақсадаш саҳм гузоштан дар рушди маърифатии ҷамъият, тарбияи ватанпарварии шаҳрвандон, паҳн намудани донишҳои илмӣ, инчунин, баланд бардоштани ҷаҳонбинии илмию таълимии донишҷӯёну омӯзгорон мебошад.

Дар давоми шаш моҳи соли 2022 дар беморхонаи марказӣ ва беморхонаи ҷумҳуриявии клиникии ноҳияи Данғара, инчунин дар маркази ташхисию таълимии «Нури тиб» ба 7250 бемор ташхису муолиҷа ва ёрии тиббӣ расонда шудааст. Аз ҷумла, 130 амалиёти ҷарроҳии реконструктивӣ - пластикӣ ва 284 намуди дигари ҷарроҳӣ гузаронда шуданд, ки дар маҷмуъ, 414 амалиёти ҷарроҳиро ташкил медиҳад. Инчунин, табобати 1024 гирифтори бемориҳои дарунӣ, ташхису табобатӣ 3304 гирифтори бемориҳои кӯдакона, муоина ва табобати 145 бемори гӯшу гулую бинӣ, 1678 бемориҳои стоматологӣ, 364 бемори чашм, 54 бемори травматологӣ ба қайд гирифта шуд. Ҳамзамон, дар дармонгоҳи Донишгоҳ 269 донишҷӯву кормандон ташхис ва табобат карда шуданд. Тавре проректори Донишгоҳ Шодмон Аҳмадов ба мо  иттилоъ дод, таҷрибаомӯзии донишҷӯён қисми асосии раванди таълим буда, барои тайёр кардани кадрҳои тиббии баландихтисос нақши муҳимро иҷро мекунад. Тибқи барнома ва нақшаҳои таълимии Донишгоҳ таҷрибаомӯзии истеҳсолии донишҷӯёни курсҳои 2 – 5 аз рӯи барномаҳои «Парастории бемор», «Кори ҳамширагӣ» ва «Кори табобатӣ» дар шуъбаҳои беморхонаҳои вилоятӣ ва Беморхонаи клиникии ҷумҳуриявӣ гузаронда мешаванд. 

 

Холназар КАСИРОВ, 

«Ҷумҳурият»