Хабарҳо
Вазирони мудофиаи Тоҷикистон ва Ӯзбекистон қарордод имзо карданд
Вазирони мудофиаи Тоҷикистон ва Ӯзбекистон қарордод имзо карданд
Вазири мудофиа Шералӣ Мирзо дар маросими пӯшидашавии машқҳои муштараки Ӯзбекистон ва Тоҷикистон «Иттиҳод – 2022», ки дар Тирмиз аз 3 август ҷараён доштанд, иштирок кард. Дар ин бора ба АМИТ «Ховар» сухангӯи Вазорати мудофиа Фаридун Маҳмадализода хабар дод.
Ба иттилои сомонаи «Овози Самарқанд», машқҳои муштараки ҳарбиёни афсарони тоҷику ӯзбек дар қисми низомии гарнизони Тирмиз гузашта буданд. Гуфта мешавад, ки низомиён дар машқҳои разм дар масофаи наздик, эвакуатсияи ярадорон, зада гардондани ҳуҷуми душмани тахминӣ иштирок намуданд.
Ҳамчунин, мулоқоти вазирони мудофиаи Тоҷикистон ва Ӯзбекистон Шералӣ Мирзо ва Баҳодир Қурбонов сурат гирифт. Ҷонибҳо дар мавриди омӯзиши кадрҳои низомии тоҷик дар донишгоҳҳои Ӯзбекистон қарордод ба имзо расонданд.
Хизматчиёни давлатии Тоҷикистон ба Ҷопон мераванд
Агентии хизмати давлатии назди Президенти Ҷумҳурии Тоҷикистон хабар дод, ки 16 хизматчии давлатии мамлакат дар доираи лоиҳаи Маркази ҳамкории байналмилалии Ҷопон (JICE) барои таҳсили дусола ба донишгоҳҳои бонуфузи Ҷопон фиристода мешавад.
Муовини директори Агентии хизмати давлатӣ Дилноза Аҳмадзода бо хизматчиёни давлатӣ-магистрантони тозаинтихоб мулоқот намуда, гуфт, ки аз онҳо 15 нафар ба магистратура ва як нафар ба докторантураи донишгоҳҳои Ҷопон барои таҳсил фиристода мешаванд.
Ғолибони бурсияҳои таҳсилӣ-хизматчиёни давлатӣ барои таҳсил дар солҳои 2022 – 2024 аз вазоратҳои адлия, корҳои хориҷӣ, рушди иқтисод ва савдо, меҳнат, муҳоҷират ва шуғли аҳолӣ, молия, фарҳанг, энергетика, Кумитаи андоз, Хадамоти гумрук, Агентии беҳдошти замин ва обёрӣ ва Мақомоти иҷроияи ҳокимияти давлатии ВМКБ мебошанд.
Миёни Бухоро ва Душанбе хатсайри мустақим ифтитоҳ меёбад
Мақомоти Ӯзбекистон ба ифтитоҳи хатсайри мустақим миёни Бухоро ва Душанбе ҳавасманданд. Тавре АМИТ «Ховар» хабар медиҳад, дар ин бора дар ҷаласаи 29-уми Сенати Олий Маҷлиси Ӯзбекистон таъкид шудааст.
Ба иттилои хадамоти матбуоти палатаи болоии парлумони Ӯзбекистон, соли 2021 ба вилояти Бухоро қариб 49 ҳазор нафар ва дар семоҳаи аввали соли 2022 беш аз 65 ҳазор сайёҳи хориҷӣ омадааст. Давоми яку ним соли охир, ҳаҷми хизматрасонӣ дар меҳмонхонаҳо, тарабхонаҳо, мавзеъҳои маданию маишӣ ва савдо аз 2 триллион сӯм гузашт.
Бо вуҷуди ин, дар соҳа ҳанӯз камбудиҳо мушоҳида мешаванд. Дар ҷаласа зарурати ба роҳ мондани хатсайрҳои мунтазам ва чартерӣ ба Бухоро аз Дубай, Ҷакарта, Куала - Лумпур, Лоҳур ва Душанбе, инчунин, фароҳам овардани шароит барои иқомат, хизматрасонӣ ба ашхоси маъюб ва афзоиши хатсайрҳои сайёҳӣ таъкид шуд.
Лашкар ШАРИФЗОДА, “Ҷумҳурият”
Баёни ақида (0) Санаи нашр: №: Мутолиа карданд: 5986