Бо ташаббуси муштараки палатаҳои савдо ва саноати вилояти Суғд  ва Красноярски Федератсияи Россия дар шаҳри Хуҷанд оид ба ҳамкориҳои тиҷоративу иқтисодӣ мулоқоти соҳибкорони ду мамлакат доир гашт. Тавре Даря Коволёва, муовини раиси палатаи савдо ва саноати Красноярск, роҳбари гурӯҳи соҳибкорони рус дар ин дидор, иброз дошт,  ҳадафи вохӯрӣ таҳкими ҳамкориҳои иқтисодӣ ҷиҳати дастрасии аҳолӣ ба маҳсулоти босифати кишоварзӣ, аз қабили меваю сабзавоти тару тоза, консерву обҳои ташнагишикан, мебошад.

- Ҳанӯз аз даврони шуравӣ медонем, ки шарбату меваҳои Тоҷикистон ширину лазизанд. Аз ин рӯ, тасмим гирифтем, ки  бо ҷалби доираи васеи соҳибкорон дар самти коркарду тиҷорати маҳсулоти кишоварзӣ чанд лоиҳаи муштараки тиҷоратиро таҳия ва татбиқ созем, - гуфт Даря Коволёва.

Дар ҳамоиш роҳбарони 18 корхона аз Красноярск  ва сарварону намояндагони 50 корхонаи саноатии вилояти Суғд иштирок ва оид ба ҳамкориҳои муштарак дар бахшҳои афзалдошта бо ҳам табодули афкор карданд.

Анвар Яқубӣ, муовини раиси вилояти Суғд, изҳори бовар намуд, ки ин ҳамоиш ҷиҳати  тавсеаи ҳамкориҳои дуҷониба такони ҷиддӣ хоҳад бахшид.

- Шароити иқлими  вилояти Суғд имкон медиҳад, ки  тамоми фасли сол  дар заминаи  ҳамкорӣ  ба  соҳибкорону тоҷирони Красноярск  меваҳои  тару тоза, ҳамчунин, хушк, шарбатҳои мевагӣ, сабзавоту обҳои  ошомиданӣ содирот гардида, аз он ҷо ба мо ғалла, масолеҳи сохтмонии чӯбу тахта ва  таҷҳизоти саноатӣ ворид шаванд, - изҳор дошт ӯ. 

 

Ҷовиди АШТӢ, “Ҷумҳурият”