Хабарҳо
ВАРЗИШ
V БОЗИҲОИ ҲАМБАСТАГИИ ИСЛОМӢ
Тоҷикистон 4 медал дорад
Дар рӯзи шашуми V Бозиҳои ҳамбастагии исломӣ (9 – 18 август, Кунияи Туркия) Екатерина Ишенко дар мусобиқаи тенниси рӯи миз миёни варзишгарони имконияташон маҳдуд сазовори медали нуқра шуд.
Бар пояи иттилои Кумитаи миллии олимпии Тоҷикистон, мусобиқаи ҷуфт-тенниси рӯи миз (класси 9) бо ширкати 4 варзишгар ба таври даврӣ сурат гирифт. Екатерина бар Пагоҳ Кулоҳрӯдӣ ва Сумайя Мустафовижафарухӣ (Эрон) пирӯз гашта, аз теннисбози мизбон Неслихон Каваш мағлуб гардид.
Бояд гуфт, ки ин чорумин медали ҳайати олимпии Тоҷикистон дар бозиҳо мебошад. Илдар Аҳмадиев дар ҷаҳиш ба дарозӣ ҷойи дуюмро гирифт. Дар гӯштии юнонӣ-римӣ Асламҷон Азизов (-55кг) ва Фирӯз Мирзораҷабов (-63кг) нишонҳои биринҷӣ ба даст оварданд.
ҶОМИ КУШОДИ ОСИЁ
Абубакр Шеров ҷойи дуюмро ишғол кард
Абубакр Шеров (-66кг) дзюдочии тоҷик дар Ҷоми кушоди Осиё ба хотираи Турар Жолдибаев (13 – 14 август, Актау, Қазоқистон) мақоми дуюмро ишғол кард.
Абубакр то финал бар се гӯштигири мизбон- Азамат Зулжалелов, Болат Билол ва Алмас Галимов пирӯз шуда, дар вохӯрии ҳалкунанда аз Сунгат Жубаткани қазоқ мағлуб гашт.
ЛИГАИ ОЛӢ
Даври 12-ум бо кадом натиҷа ба анҷом расид?
Тими “Регар-ТадАЗ” дар бозии охири даври 12-уми Чемпионати Тоҷикистон оид ба футбол миёни дастаҳои Лигаи олӣ “Хатлон”-ро дар майдонаш бо ҳисоби 1:0 шикаст дод.
Рақобатҳои дигар бо чунин натиҷа хотима ёфтанд: “Хуҷанд” – “Истиқлол” – 1:2, “Истаравшан” – “Равшан-К” – 3:0, “Файзканд” – «Равшан-З» – 2:1 ва “Эсхата” – КМВА – 3:2.
Ҳамин тавр, пас аз 12 давр “Хатлон” (19 хол), “Равшан-К” (19 хол) ва “Файзканд” (18 хол) дар мақомҳои ифтихорианд.
СУПЕРЛИГАИ ТОҶИКИСТОН
Дар 4 бозӣ 59 гол зада шуд
Садрнишини ҷадвали Суперлигаи Тоҷикистон оид ба футзал – “Сипар” дар даври даҳум бо ҳисоби 18:1 бар “Равшан” зафар ёфт.
Дар се бозии дигар “Истиқлол” бар “Пойтахт” (14:2), “Соро компания” бар КМВА (12:2) ва “Истаравшан” бар “Самандар” (8:2) ғолиб омаданд.
Маҳмуд БАҲРОМ, шореҳи варзиш
Баёни ақида (0) Санаи нашр: №: Мутолиа карданд: 5310