V БОЗИҲОИ ҲАМБАСТАГИИ ИСЛОМӢ

Паҳлавонони тоҷик се медали дигар гирифтанд

 

Дзюдочиёни тоҷик дар рӯзи 8-уми V Бозиҳои ҳамбастагии исломӣ се медал (як нуқра ва ду биринҷӣ) ба даст оварданд.

 

Нишони нуқраро паҳлавони маъруфи кишвар Комроншоҳи Устопириён (-90 кг) гирифт. Комроншоҳ то финал бар се рақибаш ғолиб омада, дар вохӯрии ҳалкунанда аз гӯштигири мизбон Михаел Зганк шикаст хӯрд. 

Мақомҳои сеюм насиби Шодмон Ризоев (-81 кг) ва Абубакри Акобир (-100 кг) гашт. 

Акнун, шумораи медалҳои Тоҷикистон дар V Бозиҳои ҳамбастагии исломӣ ба 8 адад расид. Панҷ медали дигарро Илдар Аҳмадиев (ҷаҳиш ба дарозӣ, нуқра), Асламҷон Азизов ва Фирӯз Мирзораҷабов (гӯштии юнонӣ-румӣ, биринҷӣ) ва Екатерина Ишенко  (пара-тенниси рӯи миз, нуқра ва биринҷӣ ) соҳиб шуда буданд. 

 

 

БАДМИНТОН

Чемпионати минтақавии Осиёи Марказӣ ба анҷом расид

 

Аввалин Чемпионати минтақавии Осиёи Марказӣ оид ба бадминтон байни наврасони 15 ва 17 - сола, ки мизбонаш шаҳри Душанбе (11 – 15 август, Қасри теннис ва маҷмааи варзиши обӣ) буд, хотима ёфт. Дар он варзишгарони Қазоқистон, Қирғизистон, Тоҷикистон, Ӯзбекистон ва Эрон ширкат доштанд. Бадминтонбозони эронӣ тавонистанд бештари медалҳоро соҳиб гарданд. 

 

Дар маросими ҷамъбасти мусобиқа  президенти бадминтони Осиё Антон Субово ва намояндагони Федератсияи бадминтони кишвар ва дигар соҳаи варзиши мамлакат ширкат варзиданд.

Бадминтонбозони тоҷик дар Чемпионати минтақавӣ чунин натиҷаро нишон доданд: дар намуди инфиродӣ, ҷуфтӣ ва даставӣ байни бадминтонбозони то 15-сола Одилҷон Абдураҳимов, Одилҷон Абдураҳимов/Қосим Оқилӣ, Дилмираи Бунёдзода/Арамбегим Шоискандарова, Салим Салимов/Нурафшон Чоршанбиева, Одилҷон Абдураҳимов/Қосим Оқилӣ ва Дилмираи Бунёдзода/Арамбегим Шоискандарова мақомҳои сеюмро касб карданд.

Байни бадминтонбозони то 17 - сола бошад, Ҷамолиддин Салимов /Муҳаммадсаид Салимов, Мафтун Шарипова/Омина Охунқадамова, Ҷамолиддин Салимов/Омина Охунқадамова, Мафтуна Шарипова, Омина Охунқадамова, Ҷамолиддин Салимов ва Муҳаммадсаид Салимов сазовори медалҳои биринҷӣ гаштанд.

 

Маҳмуд БАҲРОМ, шореҳи варзиш