Дар Бонки давлатии амонатгузории Ҷумҳурии Тоҷикистон “Амонатбонк” мулоқоти раиси раёсати бонк Сироҷиддин Икромӣ бо ҳайати расмии ҶС «Ширкати содиротию суғуртавии «KazakhExport»-и Ҷумҳурии Қазоқистон таҳти роҳбарии  раиси раёсати ширкати мазкур Калигазин Аслан баргузор гардид.

 

Раиси раёсати ҶС «Ширкати содиротию суғуртавии «KazakhExport» иброз дошт, ки ширкат омодааст дилхоҳ пешниҳод ва дархостҳои соҳибкорони Тоҷикистонро, ки аз Қазоқистон молу маҳсулот ворид менамоянд, дар ҳамкорӣ бо БДА ҶТ «Амонатбонк» ҷонибдорӣ намояд.

Сироҷиддин Икромӣ гуфт, ки БДА ҶТ «Амонатбонк» дар раванди сиёсати пешгирифтаи давлату Ҳукумати Ҷумҳурии Тоҷикистон ҳамеша омода аст соҳибкорони ватаниро дар самти рушди соҳибкории хурду миёна ва дарёфти шарикони рушди боэътимод дастгирӣ ва ҷиҳати воридсозии молу маҳсулот аз Қазоқистон мусоидат кунад.

Сипас, миёни БДА ҶТ «Амонатбонк» ва ҶС «Ширкати содиротию суғуртавии «KazakhExport» ёддошти тафоҳум оид ба зиёд намудани ҳаҷми иловагии маблағгузорӣ то ба 15 миллион доллари ИМА имзо шуд. 

Роҳбарияти ҶС «Ширкати содиротию суғуртавии «KazakhExport» тазаккур доданд, ки БДА ҶТ «Амонатбонк» метавонад дархостҳои иловатан пайдошударо то ҳаҷми 23 миллион доллари ИМА ба ширкати мазкур пешниҳод созанд. Онҳо дар навбати худ омодаанд, ки дархостҳоро баррасӣ ва дастгирӣ намоянд.

Дар сурати аз худ шудани меъёри ҷудогардида аз ҷониби ҶС «Ширкати содиротию суғуртавии «KazakhExport» маблағи умумӣ зиёда аз 30 миллион доллари ИМА-ро ташкил хоҳад дод.

Айни ҳол аз ҳисоби маблағҳои ҶС «Ширкати содиротию суғуртавии «KazakhExport» ба 6 лоиҳаи соҳибкорони ватанӣ ба маблағи 8,75 миллион доллари ИМА тариқи маблағгузории савдо хатҳои аккредитивӣ кушода шудааст.

 Ҳадафи асосии ба имзо расондани ёддошти тафоҳум, ин, пеш аз ҳама, ҷалби сармояи мустақим ба иқтисодиёти ҷумҳурӣ ва зиёд намудани ҳаҷми гардиши молу маҳсулот миёни соҳибкорони Тоҷикистон ва Қазоқистон ба шумор меравад. 

Бонки давлатии амонатгузории Ҷумҳурии Тоҷикистон «Амонатбонк» мекӯшад, ки дар оянда ҳам, баҳри амалӣ кардани дастуру супоришҳои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар самти дастгирии соҳибкорони ватанӣ ва ҷалби бештари сармояи хориҷӣ тадбирҳои муассирро роҳандозӣ намояд.

 

Муҳаммадзоиршо ШАРИФЗОДА, “Ҷумҳурият”