Хабарҳо
ВАРЗИШ
V БОЗИҲОИ ҲАМБАСТАГИИ ИСЛОМӢ
Туркия аз ҳама зиёд медал гирифт
18 август V Бозиҳои ҳамбастагии исломӣ дар шаҳри Кунияи Туркия ба анҷом расид. Варзишгарони Тоҷикистон бо 8 медал (3 нуқра ва 5 биринҷӣ) миёни 56 кишвари иштирокчӣ мақоми 29-умро касб карданд.
Медалҳоро аз мунтахаби мо Илдар Аҳмадиев, Екатерина Ишенко, Комроншоҳ Устопириён (нуқра), Асламҷон Азизов, Фирӯз Мирзораҷабов, Шодмон Ризоев, Абубакри Акобир ва дар намуди даставӣ оид ба дзюдо (биринҷӣ) ба даст оварда буданд.
Ҳамин тавр, дар бозиҳо аз рӯи шумораи медалҳо кишвари мизбон – Туркия бо 341 медал (145 тилло, 107 нуқра, 89 биринҷӣ) зинаи аввалро касб намуд. Ӯзбекистон бо 158 медал (51, 42, 65) ва Эрон бо 133 (39, 44, 50) ҷойҳои дуюму сеюмро гирифтанд.
ЛИГАИ ОЛӢ
Дар дербии шаҳри Душанбе «Истиқлол» мағлуб шуд
Дар бозии мавқуфмондаи даври аввали Чемпионати Тоҷикистон оид ба футбол миёни дастаҳои Лигаи олӣ КМВА дар меҳмонӣ «Истиқлол»- ро бо ҳисоби 1:0 мағлуб намуд.
Тӯби ғалабаоварро пас аз хатои муҳофизатгари дастаи мизбон Хуршед Абдуллоев (дақ.79) ба самар расонд.
Бояд гуфт, ки Наврӯз Рустамов, ҳамлагари КМВА, дар дақиқаи 60-ум бо ду корти зард аз майдон пеш карда шуд.
«Афсарон» пас аз ғалаба бо 16 хол ба зинаи панҷум баромаданд. «Истиқлол» бо 17 хол дар мавқеи чорум аст.
Ҷоми КФО – 2022 барои «Хуҷанд хотима ёфт
Дастаи «Суғдиён» (Ӯзбекистон) дар финали минтақаи марказии Ҷоми Конфедератсияи футболи Осиё – 2022 ба дарвозаи «Хуҷанд» (Тоҷикистон) чор голи беҷавоб зада, ба даври дигар роҳ ёфт.
Голҳоро Ҷасур Ҳасанов (дуто), Шоҳрӯз Норхонов ва Ҷавоҳир Қаҳрамонов заданд.
Дар даври нимниҳоии Ҷоми КФО – 2022 «Суғдиён» 6 сентябр дар майдонаш «Лиони Шарқии Ҳонгконг» - ро қабул мекунад.
Маҳмуд БАҲРОМ, шореҳи варзиш
Баёни ақида (0) Санаи нашр: №: Мутолиа карданд: 5403