Маҳмадтоир Зокирзода, Раиси Маҷлиси намояндагон, бо фиристодаи махсуси Президенти Ҷумҳурии Корея, узви Маҷлиси миллии Корея Со Бёнсу ва ҳамроҳони ӯ, ки бо сафари корӣ ба Тоҷикистон омаданд, мулоқот кард. Гуфта шуд, ки бо назардошти имконияти ҳалли масъалаҳои мубрами сиёсию иқтисодӣ ва иҷтимоӣ, муносибатҳои ду кишвар сол ба сол аҳамияти бештар касб мекунанд. 

Таъкид рафт, ки таҷрибаи Корея дар татбиқи технологияи замонавии иттилоотию коммуникатсионӣ дар соҳаҳои гунгогун метавонад мавриди омӯзиш ва истифодаи сохторҳои дахлдори Тоҷикистон қарор гирад. Бо мақсади ҷалби сармоя ва таъсиси корхонаҳои муштарак дар минтақаҳои озоди иқтисодии Тоҷикистон, ташкили намоишгоҳҳои маҳсулоти саноатии Корея дар Тоҷикистон ниҳоят муфид мебошад.

Маҳмадтоир Зокирзода зиёд намудани бурсияҳои таҳсилро ба донишҷӯёни тоҷик дар чаҳорчӯбаи барномаи бурсиявии глобалии Корея таъкид намуд.

 

 

Эрон хостори таҳкими ҳамкории байнипарлумонӣ бо Тоҷикистон шуд

Раиси Маҷлиси намояндагони Маҷлиси Олӣ Маҳмадтоир Зокирзода бо раиси Гурӯҳи дӯстии парлумонии Эрон ва Тоҷикистон, узви Кумитаи амнияти миллӣ ва сиёсати хориҷӣ Ҷалил Раҳимӣ мулоқот намуд. 

Ба иттилои Маҷлиси намояндагон, Маҳмадтоир Зокирзода гуфт, ки Ҳукумат ва парлумони кишвар дар муносибатҳои байналмилалӣ ба ҳамкорӣ бо Эрон аҳамияти ҷиддӣ медиҳанд. Дар заминаи робитаҳои байнипарлумонӣ қадамҳои устувор гузошта шудааст, ки ҷаласаи фосилавии Гурӯҳи дӯстӣ ва ҳамкорӣ, ки моҳи марти имсол баргузор гашт, далели гуфтаҳост.

Ҷалил Раҳимӣ сафари ҳайати парлумони Маҷлиси Шурои Исломии Эронро ба Тоҷикистон оғози фасли нав дар раванди муносибатҳои парлумонии ду кишвари бародар шумурда, хостори тақвияти ҳамкорӣ аз тариқи фаъол намудани гурӯҳҳои дӯстии муштарак гардид.

 

 

Мулоқоти Сироҷиддин Муҳриддин бо Ҷон Айлиев 

Вазири корҳои хориҷии мамлакат Сироҷиддин Муҳриддин директори минтақавии Барномаи озуқавории ҷаҳонӣ  Ҷон Айлиевро ба ҳузур пазируфт, - иттилоъ дод Вазорат.

Ҷонибҳо масъалаҳои ҳамкорӣ миёни Тоҷикистон ва Барномаи озуқавории ҷаҳонӣ, аз ҷумла раванди татбиқи Ҳадафҳои Рушди Устувор, таъмини амнияти озуқаворӣ, мутобиқшавӣ ба тағйирёбии иқлим ва паст кардани сатҳи хавфи офатҳои табииро баррасӣ намуданд.

 

 

Таҳкими ҳамкорӣ бо Салиби Сурх

Дар вохӯрии вазири корҳои дохилӣ Рамазон Раҳимзода бо роҳбари намояндагии Миссияи Кумитаи байналмилалии Салиби Сурх (КБСС) дар Ҷумҳурии Тоҷикистон Ангелика Шопп гуфта шуд, ки намояндагии Кумитаи байналмилалии Салиби Сурх дар Тоҷикистон аз соли 1993 инҷониб фаъолият дошта, дар ин муддат даҳҳо барномаҳоро дар самти ҳуқуқи башардӯстонаи байналмилалӣ роҳандозӣ намудааст.

Ба иттилои Вазорат, ҷонибҳо, инчунин, масъалаҳои ҳамкориҳои минбаъда ва ташкили семинару тренингҳои омӯзиширо барои кормандони мақомоти корҳои дохилӣ мавриди муҳокима қарор доданд.

Ангелика Шопп ба сатҳи ҳамкориҳо байни Вазорати корҳои дохилӣ ва намояндагии Кумитаи байналмилалии Салиби Сурх дар Тоҷикистон баҳои баланд дод.

 

 

Гуфтушунид миёни намояндагони вазоратҳои молияи Тоҷикистон ва Кувайт

Миёни ҳайати намояндагони Вазорати молия бо роҳбарии сардори сарраёсати сиёсати андоз ва пардохтҳои давлатӣ Шодиён Завқибек ва Вазорати молияи Давлати Кувайт – назораткунандаи шартномаҳои байналмилалӣ, сардори шуъбаи созишномаҳои сармоягузорӣ Суҳайл Фаҳд Занкӣ лоиҳаи протокол дар бораи ворид намудани тағйиру иловаҳо ба Созишнома байни Ҳукумати Ҷумҳурии Тоҷикистон ва Ҳукумати Давлати Кувайт «Оид ба канорагирӣ аз андозбандии дукарата ва пешгирӣ намудани саркашӣ аз супоридани андозҳо аз даромад ва сармоя» муҳокима шуд.

Мақсад аз таҳияи лоиҳаи протоколи мазкур, мутобиқ намудани муқаррароти Созишнома ба талаботи таҳрири нави Конвенсияи байналмилалӣ нисбат ба андозҳо аз даромад ва сармоя ба ҳисоб рафта, он ба рушди табодули иттилоот, батанзимдарории манбаъҳои воқеии андозбандишаванда ва беҳтар намудани фазои мусоиди соҳибкорию сармоягузорӣ нигаронда шудааст.