23 августи соли ҷорӣ дар толори Академияи миллии илмҳои Тоҷикистон рӯнамоии китобҳои нави илмӣ – тадқиқотӣ баргузор гардид. Китобҳои тозанашр ба ҳаёт ва фаъолияти сиёсиву ҷамъиятии академик Муҳаммад Осимӣ бахшида шуда, бо ибтикори кормандони Институти таърих, бостоншиносӣ ва мардумшиносии ба номи Аҳмади Дониш омода гардидаанд. Дар рӯнамоии асарҳои тозанашр олимон ва намояндагони касбу кори гуногун, ки бо академик ҳамкорӣ доштанд, ширкат варзиданд. 

 

Пас аз рӯнамоии китобҳо, ҳамоиши бузурги илмӣ доир шуд.  

Ҳамоишро академики Академияи миллии илмҳои Тоҷикистон, Фарҳод Раҳимӣ ифтитоҳ намуда, зимни суханронӣ чунин иброз намуд: «Солҳои роҳбари Академия будани хеш равоншод дар Академияи илмҳои ҶШС Тоҷикистон чораҳо андешида, имкон фароҳам меовард, ки мутахассисон аз зумраи ашхоси маҳаллӣ камол ёбанд. Ҳеҷ фардеро, ки он солҳо дар Академия фаъолият доштааст, намебинед, ки аз устод Осимӣ фикри манфӣ дошта бошад. Ҳама якмаром аз сатҳи олии инсонгарӣ ва донишмандии шодравон сухан мекунанд. 

Муҳаммад Осимӣ дар рушди илм, бавижа илмҳои табиатшиносӣ, нақши муассир гузоштааст. Пайванди илму истеҳсолот он солҳо аз такмил ёфтану тараққии бемайлони илми тоҷик гувоҳӣ медод». 

Олимон дар мавзуъҳои гуногуне чун "Муҳаммад Осимӣ - олим ва ходими давлатӣ", "Адабиёт дар чашмандози илмии Муҳаммад Осимӣ", "Муҳаммад Осимӣ ва берунишиносӣ дар Тоҷикистон", "Муҳаммад Осимӣ ва масоили забоншиносии тоҷик", "Муҳаммад Осимӣ ва ЮНЕСКО", "Муҳаммад Осимӣ - пайвандгари тоҷикон ва форсизабонони ҷаҳон", "Муҳаммад Осимӣ ва маорифи Тоҷикистон", "Муҳаммад Осимӣ ва шарқшиносии тоҷик", "Муҳаммад Осимӣ - истилоҳшинос ва қомуснигор", "Муҳаммад Осимӣ ва омӯзиши масоили фолклоршиносӣ" андешаҳояшонро баён намуда, осор ва фаъолияти муҳаққиқро мавриди баррасӣ қарор доданд. 

 

Фарзона ФАЙЗАЛӢ,  

«Ҷумҳурият»