Бо мақсади баланд бардоштани завқи бадеӣ, тақвияти неруи зеҳнӣ, дарёфти чеҳраҳои нави суханвару сухандон, сарояндагону овозхонон, баланд бардоштани маҳорати иҷрокунандагӣ, ташаккули истеъдод ва ҳунари нав-расону ҷавонон ва дигар қишрҳои ҷомеа дар ин самтҳо, инчунин, фароҳам овардани шароити мусоиди эҷоду пешниҳоди шеър ва сурудҳои таҷассумкунандаи марҳилаи нави ободкориву созандагӣ ва рушди бемайлони пойтахти мамлакат – 

шаҳри Душанбе ва, дар ин замина, эҳтиром гузоштан ба таъриху фарҳанги миллӣ, инкишофи қобилияти ҳунариву эҷодӣ, таҳкими эҳсоси худогоҳию худшиносӣ ва арҷгузорӣ ба арзишҳои соҳибистиқлолии милливу давлатӣ, соли 2022 дар шаҳри Душанбе озмуни шаҳрии “Ту қалби Тоҷикистонӣ, Душанбе” баргузор мегардад.

Ба иттилои шуъбаи иттилооти дастгоҳи раиси шаҳр, дар ин бора қарори раиси шаҳри Душанбе Рустами Эмомалӣ ба имзо расид. Ҳамчунин, бо қарори раиси шаҳр 26 август озмуни шаҳрии «Ҳунарманди сол» аз рӯи 6 номинатсия: кандакорӣ-дуредгарӣ, дӯзандагӣ, наққошӣ-рассомӣ, кулолӣ-аъҷубасозӣ, бофандагӣ ва коркарди металл доир мешавад. 

Озмун дар асоси Барномаи рушди ҳунармандии Ҷумҳурии Тоҷикистон барои солҳои 2021 – 2025 барпо шуда, ҳадаф аз он бедор намудани ҳувияти миллӣ, арҷгузорӣ ба фарҳанги миллӣ, тарбияи зебоипарастӣ, тарғибу ташвиқи либосҳои миллӣ, ҷалби сайёҳони хориҷӣ ба мамлакат, ба насли оянда мерос гузоштани ҳунарҳои аҷдодӣ ва муаррифии ҳунари волои халқи тоҷик мебошад.

 

 

 

Вазири корҳои дохилӣ сафири Қирғизистонро ба ҳузур пазируфт 

Вазири корҳои дохилӣ Рамазон Раҳимзода сафири фавқулода ва мухтори Ҷумҳурии Қирғизистон дар Ҷумҳурии Тоҷикистон Эрлан Абдилдаевро ба ҳузур пазируфт, - хабар дод маркази матбуоти Вазорат. 

Зимни вохӯрӣ масъалаҳои тақвияти ҳамкориҳо дар мубориза бар зидди ҷиноятҳои муташаккили фаромиллӣ, таъмини амният ва мубодилаи иттилоот баррасӣ гардида, ҷонибҳо ҷиҳати рушди ҳамкориҳои дуҷониба дар самти ҳифзи ҳуқуқ ва суботу осоиш изҳори бовар намуданд.

 

 

 

Ёддошти тафоҳум оид ба ҳамкорӣ дар самти муқовимат бо коррупсия

Директори Агентии назорати давлатии молиявӣ ва мубориза бо коррупсия Сулаймон Султонзода ва раиси Комиссияи зиддикоррупсионии Фаластин Роид Муҳаммад Радван зимни вохӯрӣ Ёддошти тафоҳум оид ба ҳамкорӣ дар самти муқовимат бо коррупсия имзо карданд.

Ба иттилои Агентӣ, Сулаймон Султонзода иброз дошт, ки ниҳод ҳамеша ҷонибдори бештар ба роҳ мондани ҳамкориҳо бо ташкилотҳои байналмилалӣ ва кишварҳои хориҷӣ дар самти муқовимат бо коррупсия буда, имзои Ёддошти мазкурро заминаи мусоид барои рушди муносибатҳои минбаъда бо Давлати Фаластин дар ин ҷода медонад.

 

 

 

Дар Кӯлоб Форуми байналмилалии иқтисодӣ доир мегардад

Шуъбаи иттилоотӣ-таҳлилии дастгоҳи раиси вилояти Хатлон хабар дод, ки 26 – 27 август дар шаҳри Кӯлоб Форуми байналмилалии иқтисодии «Кӯлоб – 2022» баргузор мегардад. 

Дар доираи Форум намоишгоҳи молу маҳсулоти истеҳсолкунандагони  ватанӣ дар бахши саноат, кишоварзӣ  ва  хизматрасонии бонкӣ пешкаши меҳмонон мешавад.

Аз ин рӯ, аз тамоми сармоягузорон даъват шуд, ки бо мақсади амалӣ намудани лоиҳаҳои сармоягузорӣ, ҷалби бештари сармояи хориҷӣ, бунёди корхонаҳои муштарак ва ба роҳ мондани ҳамкории судманд дар Форуми байналмилалии иқтисодӣ иштирок намоянд.