Хабарҳо
ХИЗМАТИ ДАВЛАТӢ. КУРСҲОИ САЙЁРИ ТАҶРИБАОМӮЗӢ БАРОИ РАИСОНИ ҶАМОАТҲО
Дар шаҳри Ҳисор аз 22 то 24 август дар доираи нақшаи курсҳои азнавтайёркунӣ, такмили ихтисос ва таҷрибаомӯзии хизматчиёни давлатии Академияи идоракунии давлатии назди Президенти Ҷумҳурии Тоҷикистон аз рӯи барномаи “Нақши ҷамоатҳои шаҳрак ва деҳот дар рушди иҷтимоию иқтисодии маҳал” барои раисони ҷамоатҳои шаҳраку деҳоти шаҳру ноҳияҳои Ҳисор, Истаравшан, Нуробод, Вахш ва Шамсиддин Шоҳин курси сайёри таҷрибаомӯзӣ баргузор гардид.
Тавре аз Агентии хизмати давлатӣ хабар доданд, давраи омӯзишӣ дар асоси нақшаи чорабиниҳои Дастгоҳи иҷроияи Президенти Ҷумҳурии Тоҷикистон, бо қарори шурои олимони Академияи идоракунии давлатӣ дар мувофиқа бо Агентии хизмати давлатии назди Президенти Ҷумҳурии Тоҷикистон тасдиқ гардидааст, гузаронда мешавад.
Раиси шаҳр Қосим Роҳбар дар маросими оғози давраи сайёри омӯзишӣ гуфт, ки Мақомоти иҷроияи ҳокимияти давлатии шаҳри Ҳисор баргузории онро дар доираи татбиқи талаботи Қонуни Ҷумҳурии Тоҷикистон «Дар бораи хизмати давлатӣ» ва ҳамкорӣ бо Агентии хизматии давлатӣ барои баланд бардоштани мақоми шаҳрак ва деҳот дар сохтори давлатдории муосир дастгирӣ мекунад. Ҳамзамон, барои дар сатҳи баланд баргузор гардидани машғулияти амалию омӯзишӣ мусоидат менамояд.
Муовини директори Агентии хизмати давлатӣ Дилноза Аҳмадзода, муовини ректори Академияи идоракунии давлатӣ Исмоил Абдуалимзода, директори Донишкадаи такмили ихтисос ва бозомӯзии хизматчиёни давлатӣ Ибодат Ғанӣ оид ба нақши ҷамоатҳои шаҳраку деҳот дар рушди иҷтимоию иқтисодии маҳал ва масъулияту вазифаҳои раисони ҷамоатҳо дар ин самт сухан намуданд.
Иштирокчиёни курси таҷрибаомӯзӣ дар доираи машғулияти амалӣ аз ҶСП “Агротехсервис”, ҶДММ “Ситабр Агро”, ҶДММ “Труба ва профили тоҷик”, ҶДММ ба номи Латиф Муродов, ҶСП “Корпоратсияи Баракат”, мавзеъҳои сайёҳии экологии шаҳр ва деҳоти Сомон дидан намуда, бо фаъолияти корхонаҳои саноатӣ, хоҷагиҳои кишоварзӣ, аз ҷумла боғу токпарварӣ, имкониятҳои сайёҳӣ ва, инчунин, коргузорӣ дар деҳоти Сомон ва Деҳқонобод дар самти ҳуҷҷатнигорӣ барои мубодилаи таҷриба шинос гардиданд.
Нигина РАҲМОН, «Ҷумҳурият»
Баёни ақида (0) Санаи нашр: №: Мутолиа карданд: 6528