Чанде пеш Корхонаи воҳиди давлатии таъминот ва савдои «Китоб»-и Вазорати фарҳанг дар доираи чорабиниҳо вобаста ба татбиқи Барномаи давлатии рушди муассисаҳои фарҳангии Ҷумҳурии Тоҷикистон барои солҳои 2021 - 2025 бо мақсади мукаммалгардонии захираи китобхонаҳо  ҳаракати фарҳангии «Корвони китоб»-ро ба Вилояти Мухтори Кӯҳистони Бадахшон (шаҳри Хоруғ, ноҳияҳои Шуғнон, Рӯшон, Дарвоз, Ванҷ, Ишкошим, Роштқалъа) бурд.

 

Дар назди Театри вилоятии ба номи Меҳрубон Назарови шаҳри Хоруғ намоиш - фурӯши китобҳои тозанашр баргузор гардид, ки дар он аҳли фарҳангу маориф, тандурустӣ, мақомотҳои қудратӣ дидан намуда, китобҳои мавриди таваҷҷуҳи хешро хариданд. Мардуми сарбаланди Хоруғ “Корвони китоб”-ро бо шодию нишоти беандоза истиқбол намуда, бо самимияту ихлос аз намоиш-фурӯш дидан карданд.

Дар намоиши китоб зиёда аз 530 номгӯй адабиёти илмӣ, соҳавӣ, сиёсӣ, тиббӣ, бадеӣ, бачагона аз осори адибони классику муосир ва ҷаҳон пешниҳод гардид.

Қобили зикр аст, ки “Корвони китоб” аз ҳисоби барномаи мазкур ба китобхонаҳои шаҳри Хоруғ 473 нусха китоб ба маблағи 15852,96 сомонӣ ройгон тақдим намуд.

Дар маҷмуъ, 3440 нусха китоби тозанашр ба маблағи 100 000 сомонӣ ба китобхонаҳои шаҳру ноҳияҳои вилоят тақдим гардиданд.

 

М. ХОЛИҚЗОДА

корманди Вазорати фарҳанг