Хабарҳо
Иҷлосияи якуми ғайринавбатии Маҷлиси намояндагон
Таҳти раёсати Раиси Маҷлиси намояндагони Маҷлиси Олӣ Маҳмадтоир Зокирзода иҷлосияи якуми ғайринавбатии Маҷлиси намояндагон, даъвати шашум, баргузор шуд, - хабар доданд аз Маҷлиси намояндагон.
Дар иҷлосия лоиҳаҳои қарорҳои Маҷлиси намояндагон дар хусуси тасдиқи фармонҳои Президенти Ҷумҳурии Тоҷикистон дар бораи аз вазифа озод кардани муовинони раиси Бонки миллии Тоҷикистон ва таъин намудани муовини аввал ва муовинони нави раиси Бонки миллӣ баррасӣ шуда, аз рӯи ҳамаи масъалаҳо қарорҳои дахлдор қабул гардиданд.
ХАТЛОН. Рамазон Раҳимзода бо лоиҳаҳои иншооти соҳавӣ шинос шуд
Вазири корҳои дохилӣ Рамазон Раҳимзода ба шаҳри Бохтар омада, бо лоиҳаҳои бунёди маҷмааи ҳавзи шиноварӣ барои кормандони милитсия, маркази таълимии раёсати Хадамоти оташнишонии ВКД дар вилояти Хатлон ва бинои маъмурии раёсати мазкур, ки оғози сохтмонашон рӯзҳои наздик дар назар аст, шинос шуд.
Ба иттилои Вазорат, инчунин, вазир аз рафти корҳои ободонӣ дар раёсати ВКД дар вилоят, ДТММ-и вилоят ва қисми ҳарбии 3503-и раёсати Қӯшунҳои дохилӣ дидан намуда, бо хизматчиён ва афсарону сарбозон мулоқот кард.
Сардори раёсати ВКД дар вилоят Файзулло Нозимзода ба вазири корҳои дохилӣ аз рафти корҳои сохтмонӣ дар шуъбаҳои ВКД-и шаҳру ноҳияҳои вилоят гузориш дод.
Пешниҳоди маълумотномаи тиббӣ оид ба COVID – 19 ҳатмӣ мебошад
Бо назардошти афзоиши бемории сироятии COVID – 19 дар аксари кишварҳои ҷаҳон, Ситоди ҷумҳуриявӣ оид ба пурзӯр намудани чораҳои зиддиэпидемикӣ барои пешгирии интиқол ва пайдоиши сирояти нави коронавирус дар Ҷумҳурии Тоҷикистон қарор қабул намуд, ки пешниҳоди маълумотномаи тиббӣ оид ба бемории сироятии COVID-19 (ПСР-тест) ва ё шаҳодатномаи ваксинатсия ҳангоми сафар тавассути нақлиёти ҳавоӣ ба Тоҷикистон ҳатмӣ мебошад.
Дар робита ба ин, Агентии авиатсияи гражданӣ иттилоъ медиҳад, ки ҳар давлат ҷиҳати пешниҳоди маълумотномаи тиббӣ оид ба бемории COVID – 19 (ПСР-тест) ва ё шаҳодатномаи ваксиназанӣ талаботи худро ҷорӣ намудааст ва вобаста ба масъалаи мазкур шаҳрвандон метавонанд ҳангоми хариди чиптаи ҳавопаймо аз нуқтаҳои чиптафурӯшӣ маълумоти заруриро дастрас намоянд.
Академияҳои Тоҷикистону Озарбойҷон табодули таҷриба хоҳанд кард
Сафири фавқулода ва мухтори Ҷумҳурии Тоҷикистон дар Ҷумҳурии Озарбойҷон Рустам Солӣ бо ректори Академияи идоракунии давлатии назди Президенти Ҷумҳурии Озарбойҷон Алакбаров Урхан вохӯрд.
Вазорати корҳои хориҷӣ иттилоъ дод, ки зимни мулоқот миёни ҷонибҳо оид ба ҳамкории Академияи мазкур бо Академияи идоракунии давлатии назди Президенти Ҷумҳурии Тоҷикистон ва дигар муассисаҳои таҳсилоти олии кишвар ҷиҳати табодули иттилоъ ва таҷриба, таҳия ва татбиқи барномаҳои муштараки таълимӣ, ташкили коромӯзии кормандони соҳавӣ табодули афкор сурат гирифт.
Наврасони тоҷик ба Москва рафтанд
Бо дастгирии Мақомоти иҷроияи ҳокимияти давлатии шаҳри Душанбе як гурӯҳ таълимгирандагони Муассисаи давлатии «Маркази кӯдакон ва наврасони шаҳри Душанбе» ҷиҳати иштирок дар Форуми якуми байналмилалии фарҳангии кӯдакон, ки аз 24 то 28 август дар шаҳри Москваи Федератсияи Россия ҷараён мегирад, сафар намуд.
Директори муассиса Комилҷон Холов хабар дод, ки дар Форум зиёда аз 1,5 ҳазор кӯдакону наврасон аз тамоми минтақаҳои Россия, инчунин, намояндагони 10 кишвар иштирок карда, тибқи барнома, дар 60 чорабинии гуногун ширкат меварзанд. Инчунин, ба воситаи форум кӯдакону наврасон бо якдигар табодули таҷрибаи эҷодӣ намуда, бо ҷойҳои ҷолиби диққати Москва ва мавзеъҳои таърихии он шинос мешаванд. Иштирокдорон бо шахсиятҳои барҷастаи Россия низ вомехӯранд.
Форум ба наврасон имкон фароҳам меорад, ки лоиҳаҳои эҷодии худро дар сатҳи байналмилалӣ пешниҳод созанд. Беҳтарин лоиҳа маблағгузорӣ мешавад.
Баёни ақида (0) Санаи нашр: №: Мутолиа карданд: 6486