КОРРУПСИЯ

50000 сомонӣ барои 0,04 гектар қитъаи замин

 

Парвандаи ҷиноятӣ нисбат ба Шамсулло Нозимов, муовини раиси Ҷамоати деҳоти Садриддин Айнии ноҳияи Варзоб, баъд аз анҷоми тафтиши пешакӣ барои моҳиятан баррасӣ намудан, ба суд ирсол шудааст. 

 

Дар ин бора маркази матбуоти Агентии назорати давлатии молиявӣ ва мубориза бо коррупсияи Ҷумҳурии Тоҷикистон хабар дод. Тибқи иттилои манбаъ, номбурда бо истифода аз мақоми хизматӣ аз шаҳрванд “А” барои ҷудо намуда додани 0,04 гектар қитъаи замин 50000 сомонӣ талаб намудааст. Шамсулло Нозимов аз ин мабалағ қаблан 20000 сомониашро гирифта, ҳангоми гирифтани 30000 сомонии дигар дастгир шуд.

Парвандаи ҷиноятӣ нисбат ба ӯ бо моддаи 247 қисми 4 банди “б” Кодекси ҷиноятӣ (қаллобӣ ба миқдори махсусан калон) мавриди тафтиш қарор гирифтааст, ки ин банди қонун ҷазо дар намуди ҷарима ба андозаи аз як ҳазору чорсаду шаст то дуҳазору яксаду навад нишондиҳанда барои ҳисобҳо ё маҳрум сохтан аз озодӣ ба муҳлати аз ҳашт то дувоздаҳ солро пешбинӣ менамояд.

 

 

ҚАЛЛОБӢ 

Ду “иҷорашин” хонаҳои мардумро фурӯхтаанд

 

Кормандони мақомоти милитсия ду бонуеро ба гумони содир намудани ҷинояти қаллобӣ боздоштанд, ки хонаҳои дар шаҳри Душанбе иҷорагирифтаашонро бо тартиб додани ҳуҷҷатҳои қалбакӣ фурӯхтаанд. 

 

Маркази матбуоти Вазорати корҳои дохилӣ аз онҳо занҳои 32 ва 28 сола ном мебарад, ки дар ду маврид даст ба чунин амал задаанд. Аз ҷумла, гумонбарон хонаи истиқоматии марбут ба марди 35-сола, воқеъ дар кӯчаи Зарафшони шаҳри Душанберо ба иҷора гирифта, дар ҳамдастӣ бо марди 72-сола 220 ҳазор сомонӣ ба фурӯш гузоштаанд. Дар мавриди дуюм як хонаи дигарро дар кӯчаи Соҳилии пойтахт ғайриқонунӣ ба маблағи 140 ҳазор сомонӣ фурӯхтаанд, ки ҳоло оид ба ҳар ду ҳолат тафтишот идома дорад. 

 

Шуъбаи ҳуқуқи рӯзномаи «Ҷумҳурият»