Хабарҳо
ҲИСОР. ТАҚСИМОТИ ОДИЛОНАИ ЗАМИН БА НИЁЗМАНДОН
Бо иштироки раиси шаҳри Ҳисор Қосим Роҳбар дар мавзеи Ҳалқадашти деҳоти ба номи Турсунзода ба 121 нафар ниёзманде, ки солҳо дар навбати гирифтани қитъаи замини наздиҳавлигӣ буданд, ба таври озоду шаффоф ва тариқи қуръапартоӣ қитъаи замини наздиҳавлигӣ тақсим гардид.
Тавре аз Мақомоти иҷроияи ҳокимияти давлатии шаҳр иттилоъ доданд, бо дастури раиси шаҳр ба омӯзгорону табибон, нафароне, ки ду фарзандашон адои хизматӣ ҳарбӣ намудаанд, маъюбон, кормандони ҳифзи ҳуқуқу тартибот бе навбат, бе иштирок дар қуръапартоӣ ва бо хоҳиши худашон ҳуқуқи дар ҷойи дилхоҳашон интихоб кардани қитъаи замин дода шуд. Дигарон ба тариқи қуръапартоӣ соҳиби қитъаи замин гардиданд.
Аз ҷониби раиси шаҳр дар маъракаи тақсими замини наздиҳавлигӣ иброз гардид, ки Мақомоти иҷроияи ҳокимияти давлатии шаҳр минбаъд низ ба нафароне, ки вазифаҳои давлатию хизматии хешро содиқона адо менамоянд, дар дастрасӣ ба замин ва дигар имтиёзҳои давлатӣ бартарият дода мешавад.
Раиси шаҳр шаҳрвандонеро, ки соҳиби замин шуданд, муборакбод гуфта, онро туҳфаи Пешвои миллат муҳтарам Эмомалӣ Раҳмон ба муносибати таҷлили 31-солагии Истиқлоли давлатӣ номид. Зимнан, зикр кард, ки Ҳукумати мамлакат барои бо манзил таъмин гардидани шаҳрвандон пайвас-та тадбирҳои зарурӣ меандешад.
Ёдрас мешавем, роҳбарияти шаҳр зимни натиҷагирӣ аз фаъолияти Мақомот дар нимсолаи аввал иброз дошта буд, ки дар ҳудуди шаҳр ҳоло 150,82 гектар майдони заминҳои тақсимношудаи фонди манзил боқӣ мондааст, ки барои ҳалли мушкилоти дар ин самт мавҷудбуда ҳамкорӣ ва корбарӣ бо Кумитаи давлатии идораи замин ва геодезӣ идома дорад. Шумораи умумии аризаҳои шаҳрвандони эҳтиёҷманд барои гирифтани қитъаи замини наздиҳавлигӣ 35 ҳазору 534 нафарро ташкил дода, аз шумораи умумии аҳолӣ (339915 нафар) 10,4 дарсад-ро ташкил медиҳад.
Нигина РАҲМОН, «Ҷумҳурият»
Баёни ақида (0) Санаи нашр: №: Мутолиа карданд: 5056