1-уми сентябр Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар Қасри миллат дар маросими ифтитоҳи панҷ мактаби миёнаи русӣ дар Ҷумҳурии Тоҷикистон иштирок ва суханронӣ карданд.

 

Маросими ифтитоҳи мактабҳои нав бо иштироки Президенти Ҷумҳурии Тоҷикистон муҳтарам Эмомалӣ Раҳмон ва Президенти Федератсияи Россия муҳтарам Владимир Путин ба таври видеоӣ сурат гирифт.

Нахуст, оид ба охирин омодагиҳо ба расми ифтитоҳи муассисаҳои нави таълимӣ дар шаҳрҳои Душанбе, Кӯлоб, Хуҷанд, Бохтар ва Турсунзодаи Ҷумҳурии Тоҷикистон вазири маориф ва илми Тоҷикистон Раҳим Саидзода ва вазири маорифи Федератсияи Россия Сергей Кравтсов маълумот доданд.

Ба сарварони давлатҳо ва дигар иштирокдорони маросим оид ба ҷараёни татбиқи лоиҳаҳои бунёди муассисаҳои таълимӣ видеофилми кӯтоҳ пешкаш шуд.

Бояд гуфт, ки дар доираи ҳамкориҳои  Тоҷикистону Россия дар шаҳри Душанбе дар масоҳати 2,4 гектар муассисаи таълимии муосир барои  2448  хонанда  қомат афрохт.

Дар маросими ифтитоҳи он Раиси Маҷлиси миллии Маҷлиси Олӣ, раиси шаҳри Душанбе Рустами Эмомалӣ иштирок карданд. Сипас, дар маросими ифтитоҳи панҷ мактаби нави русӣ Президенти Ҷумҳурии Тоҷикистон муҳтарам Эмомалӣ Раҳмон ва Президенти Федератсияи Россия муҳтарам Владимир Путин оид ба ҳолати кунунӣ ва дурнамои равобити ду кишвар, бахусус дар бораи самараи ҳамкориҳо дар соҳаи илму маориф, нутқи пурмуҳтаво карданд.

Баъди суханронӣ, сарварони давлатҳо муҳтарам Эмомалӣ Раҳмон ва муҳтарам Владимир Путин дар фазои тантанавӣ барои буридани лентаи рамзӣ ва ба фаъолият оғоз кардани мактабҳои наву замонавии русӣ дар шаҳрҳои Душанбе, Кӯлоб, Хуҷанд, Бохтар ва Турсунзода иҷозат доданд.