Хабарҳо
Кумаки Рустами Эмомалӣ ба қишри ниёзманди пойтахт
Дар арафаи Ҷашни 31-умин солгарди Истиқлоли давлатӣ қарори раиси шаҳри Душанбе дар бораи ҷудо намудани маблағ ба имзо расид, ки тибқи он, дар маҷмуъ, ба 5 ҳазор нафар, аз ҷумла иштирокчиёну маъюбони Ҷанги Бузурги Ватании солҳои 1941 – 1945, шахсони ба онҳо баробаркардашуда, хонандагони Муассисаи давлатии таҳсилотӣ барои кӯдакони ятим ва бепарастор, инчунин, кормандони муассисаҳои роҳсозии шаҳр кумакҳои пулию моддӣ расонда шуд.
Тавре шуъбаи иттилооти дастгоҳи раиси шаҳр хабар дод, мувофиқи қарор, раисони ноҳияҳои шаҳри Душанбе муваззаф гардиданд, ки дар арафаи таҷлили Ҷашни Истиқлоли давлатӣ дар доираи санадҳои меъёрии ҳуқуқӣ ҷиҳати расондани кумаки моддӣ ба ятимону бепарасторон ва шахсони яккаву танҳо низ тадбирҳо андешанд.
Супурдани нусхаи эътимоднома
Сафири фавқулода ва мухтори Украина дар Ҷумҳурии Тоҷикистон Валерий Евдокимов нусхаи эътимодномаи худро ба муовини вазири корҳои хориҷӣ Содиқ Имомӣ супурд, - хабар дод Вазорат.
Зимни маросим перомуни масъалаҳои мубрами муносибатҳои Тоҷикистону Украина ва ҳамкориҳои ду кишвар дар доираи созмонҳои байналмилалӣ табодули афкор сурат гирифт.
Душанбе – дӯстдоштатарин макони шаҳрвандони Россия
Фурудгоҳи бузурги Москва– Внуково маъмултарин самтҳои сайёҳӣ дар мавсими тобистонро интишор кард. Тобистони соли ҷорӣ дар фурудгоҳи Внуково «Хатсайри Москва– Душанбе» ба қатори панҷгонаи маъмултарин самтҳои байналмилалӣ шомил шуд,- иттилоъ медиҳад АМИТ "Ховар" бо истинод ба Агентии хабарҳои шаҳрии «Москва».
Ба ҳамин тариқ, парвозҳо аз фурудгоҳи Внуково ба Душанбе, Анталия, Ереван, Истанбул ва Дубай дар мавсими тобистон самтҳои маъмултарини хориҷӣ гардиданд.
Агентии «Москва» хатсайри SZ 334 «Москва – Душанбе»-ро, ки тавассути ширкати ҳавопаймоии «Сомон Эйр» анҷом дода мешавад ва хатсайри UT 803 «Москва – Душанбе»-ро, ки аз ҷониби ширкати ҳавопаймоии Россия «ЮТэйр» амалӣ мегардад, дар назар дорад.
Санги асоси бинои нави факултети Академияи ВКД гузошта шуд
Бо мақсади таҷлили шоистаи Ҷашни 35-солагии Истиқлоли давлатӣ, дар ҳудуди бинои маъмурии факултети №4-и Академияи ВКД, воқеъ дар шаҳри Хуҷанд, бинои нав бо тарҳи замонавӣ қомат хоҳад афрохт.
Бо иштироки раиси вилояти Суғд Раҷаббой Аҳмадзода, муовини вазири корҳои дохилӣ Саиднахш Раҳмонзода, сардори раёсати ВКД дар вилоят Абдулло Навҷувонов, сардори Академияи ВКД Файзалӣ Шарифзода, раиси шаҳр Фирдавс Шарифзода ва ҳайати омӯзгорону курсантони муассисаи олии таълимӣ дар макони сохташавандаи иншоот маросими гузоштани санги асос баргузор гардид.
Бинои маъмурӣ аз таҳхона ва шаш ошёна иборат буда, дар он хобгоҳ, 17 синфхонаи таълимӣ, маҷлисгоҳ барои 500 ҷои нишаст, ҳуҷраҳои корӣ ва иншооти ёрирасон бунёд мешаванд. Интизор меравад, ки иншоот моҳи сентябри соли 2023 мавриди баҳрабардорӣ қарор гирад.
Гузаргоҳи марзии Ҷартеппа муваққатан баста мешавад
Аз 5 то 16 сентябр гузаргоҳи сарҳадии Ҷартеппаи Ӯзбекистон, ки бо мавзеи Саразми шаҳри Панҷакенти Тоҷикистон ҳаммарз мебошад, муваққатан баста мешавад, - иттилоъ медиҳад Вазорати нақлиёти Ҷумҳурии Тоҷикистон.
Маҳдудият дар ин гузаргоҳи марзӣ, инчунин, басташавии фурудгоҳи Самарқанд ба баргузории нишасти сарварони кишварҳои узви Созмони ҳамкории Шанхай, ки 15 – 16 сентябр дар шаҳри Самарқанд доир мегардад, иртибот дорад.
Гузаргоҳи Ҷартеппа дар марзи ноҳияи Ургути вилояти Самарқанд бо деҳоти Саразми шаҳри Панҷакенти вилояти Суғд ҷойгир аст. Аз ин гузаргоҳ, асосан, сокинони шаҳри Панҷакенту ноҳияи Айнии Тоҷикистон, ки ба тамошои Самарқанду Бухоро мераванд ва онҳое, ки аз тариқи фурудгоҳи Самарқанд ба Россия сафар мекунанд, истифода мебаранд.
Инчунин, 5 – 16 сентябр барои ҳаракати шаҳрвандон ва воситаҳои нақлиёт тавассути ин нуқтаи гумрукӣ маҳдудияти муваққатӣ ҷорӣ мегардад.
Лашкар ШАРИФЗОДА, «Ҷумҳурият»
Баёни ақида (0) Санаи нашр: №: Мутолиа карданд: 2525