Ноҳияи Шаҳритус дар партави сиёсати дурандешонаи иқтисодию иҷтимоие, ки Президенти кишвар муҳтарам Эмомалӣ Раҳмон дар масири Тоҷикистони соҳибистиқлол роҳандозӣ кардаанд ва, ҳамзамон, аз заҳмати софдилонаи роҳбарон, мутахассисони соҳаҳои гуногун ва мардуми шарифаш сол ба сол ободтару зеботар мешавад, аз бисёр ҷиҳат ба натиҷаҳои назаррас ноил гаштааст, – иброз дошт зимни суҳбат Ҷаббори Ғаффор, раиси ноҳия. 

 

БЕШ АЗ 150 МИЛЛИОН СОМОНӢ БАРОИ ОБОДОНӢ

 

Яке аз санадҳои муҳиме, ки боиси даст ёфтан ба ободкориҳои бештар гардид, Барномаи рушди иҷтимоию иқтисодии ноҳияи Шаҳритус барои солҳои 2021-2025 мебошад. 

Барнома аз 94 лоиҳа иборат буда, харҷи 151 миллиону 589 ҳазор сомониро дар бар гирифтааст. Барои иҷрои он аз тамоми сарчашмаҳои дохилӣ ва ташкилотҳои ғайридавлатӣ ва барномаҳои Созмони Милали Муттаҳид истифода мешавад. То ин муддат дар соҳаҳои кишоварзӣ 10 лоиҳа, саноат – 6,  сохтмон – 10,  маориф – 14, соҳаи тандурустӣ – 12, фарҳанг – 6, сайёҳӣ ва варзиш – 12, хоҷагии манзилию коммуналӣ – 4, барқтаъминкунӣ – 10, нақлиёт ва хоҷагии роҳ – 5 ва ҳифзи муҳити зист ва ҳолатҳои фавқулода ва мудофиаи гражданӣ 3 лоиҳа амалӣ гардидааст. Дар шаш моҳи аввали соли 2022 аз 94 лоиҳаи пешбинишуда 38 лоиҳа ба маблағи 54 миллиону 419 ҳазору 92 сомонӣ иҷро шуд.

 

САРМОЯГУЗОРИИ ОҚИЛОНА – ОМИЛИ ПЕШРАВӢ

 

Мувофиқи маълумоти бахши сармоягузорӣ ва идораи амволи давлатии ноҳия, дар Шаҳритус ҳафт лоиҳаи давлатии сармоягузорӣ дар ҳаёт татбиқ мегардад, ки  маблағи умумии азхудшуда 2,3 миллион доллари ИМА-ро ташкил медиҳад. Аз ҷумла, лоиҳаҳои “Тиҷоратикунонии соҳаи кишоварзӣ”, “Барномаи мутобиқгардонӣ ва кам кардани оқибатҳои тағйирёбии иқлим дар ҳавзаи баҳри Арал”, “Тақвияти таҳсилоти касбии техникӣ ва омӯзиш”, “Ҷорӣ намудани ҳисобкунии яклухти таҳлили барқ ва беҳтаргардонии низоми интиқоли барқ”,  “Рушди  иқтисодиёти деҳот”, “Мустаҳкам  намудани  инфрасохтори  муҳим ҷиҳати   таъмини  устуворӣ зидди хатарҳои тиббӣ ”ва лоиҳаи “Фавқулода бар зидди  бемории  COVID – 19”. Натиҷаи азхудкунии лоиҳаҳо ва дигар маблағгузориҳо буд, ки   дар шаш моҳи соли равон ҳаҷми истеҳсоли маҳсулоти саноатӣ ба 90 миллиону 884 ҳазору 700 сомонӣ расид. Ин нишондод бо нархҳои муқоисавӣ 122,1 дарсадро нисбат ба соли гузашта ташкил медиҳад. Баҳри таъмини бозорҳои дохилӣ ва хориҷӣ бо маҳсулоти хушсифат дар ин давра 564 тонна биринҷ, 7  ҳазору 899,5 тонна нон ва маҳсулоти нонӣ (112,9 дарсад), 2 миллиону 626 ҳазору 140 дона хишти сементӣ (105,6 дарсад)  ва 1 ҳазору 588,3 тонна гӯшт (100,1 фоиз бо вазни зинда) истеҳсол шудааст.

 

БУНЁДКОРИҲО ЗИЁДАНД

 

Анҷом додани корҳои сохтмонӣ ва меъморӣ баҳри бо туҳфаҳои арзанда пешвоз гирифтани Ҷашни 35-солагии Истиқлоли давлатии Ҷумҳурии Тоҷикистон на танҳо дар ноҳияи Шаҳритус, балки дар ҷумҳурӣ яке аз самтҳои асосии фаъолият ба ҳисоб рафта, дар доираи таваҷҷуҳи рӯзафзуни Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон сол ба сол дар Ватани азизамон биною иншооти назаррабо ва аз ҷиҳати сифат ҷавобгӯ ба талаботи муосир қомат меафрозанд.

Бахшида ба ин Ҷашни азими миллӣ, яъне 35-умин солгарди  Рӯзи Истиқлоли давлатӣ дар ноҳияи Шаҳритус бунёди 327 иншооти таъиноти гуногун ба нақша гирифта шудааст, ки аз ин теъдод 34 ададаш коргоҳу корхонаҳои нави саноатӣ мебошад. Ин, албатта, ҷиҳати расидан ба ҳадафи чоруми миллӣ: Саноатикунонии босуръати кишвар ва Солҳои 2022-2026: Солҳои рушди саноат мусоидат мекунад. Аз шумораи умумии иншооти зикршуда 21-тои он, аллакай, мавриди баҳрабардорӣ қарор гирифтааст.  

 Айни ҳол эъмори биноҳои истиқоматӣ, маъмурию маишӣ, таълимӣ, варзишӣ ва сайёҳӣ дар авҷ аст. Ба ин сохтмони Коллеҷи тиббӣ – иҷтимоӣ, сехи дӯзандагӣ, сартарошхона ва дорухона дар деҳоти ба номи Талбак Садриддинов, ҳаммом, муассисаи томактабӣ барои 50 кат дар деҳоти ба номи Ҷӯра Назаров, маҷмаи хизматрасонии варзишӣ – фароғатии сеошёна дар деҳоти Обшорон, таъмири роҳҳои ҳудуди ноҳия, бинои таълимии рақами 11 барои 240 ҷойи нишаст дар деҳаи Лолазори деҳоти ба номи Талбак Садриддинов, бинои муассисаҳои таълимии рақами 14 барои 240 ҷойи нишаст дар деҳаи Султонобод ва рақами 18 барои 240 ҷойи нишаст дар деҳаи Устокорони деҳоти Пахтаобод, маҷмааи хизматрасонӣ, майдончаи варзиш, мағозаи сеошёна дар кӯчаи Исмоили Сомонии шаҳраки Шаҳритус ва ғайраҳо мисол шуда метавонанд.

Бо мақсади истиқбол аз 31-солагии Рӯзи Истиқлоли давлатии Ҷумҳурии Тоҷикистон як қатор иншооти таъиноташон гуногун мавриди истифода қарор дода шуданд. Чунончи, анбор барои нигоҳдории маводи хоҷагии халқ дар деҳаи Ҷ. Деҳқони деҳоти ба номи Ҷӯра Назаров, мағоза дар шаҳраки Шаҳритус, дарвозаи тақсимоти об дар наҳри Сайёд, коргоҳҳои сементбарорӣ дар деҳаҳои Лолазор ва Сайёд, насби ду трансформатор ва бунёди ду синфхонаи иловагӣ дар деҳаи Гулистон, дорухона дар шаҳраки Шаҳритус, майдончаи варзишии замонавӣ дар деҳаи Янгиобод, коргоҳи қаннодӣ, коркарди гандум ва шолӣ дар деҳоти ба номи Ҷ. Назаров ва ҳоказо. Мушаххасан, то имрӯз аз шумораи умумии иншооти ҷашнӣ 21-тои онҳо ба истифода дода шуда, 61 ҷойи нави кор муҳайё гардид.  

ЧАШМАНДОЗЕ БА НАТИҶАИ ЗАҲМАТИ КИШОВАРЗОН ВА МИРОБҲО

 

Дар нимсолаи аввали соли равон ҳаҷми истеҳсоли маҳсулоти кишоварзӣ дар ҳамаи шаклҳои хоҷагидорӣ 443 миллиону 657 ҳазору 400 сомониро ташкил дод (106,4%), ки дар қиёс ба шаш моҳи соли гузашта 27  миллиону 795 ҳазор сомонӣ зиёд мебошад. Дар маҷмуъ, 1588,3 тонна гӯшт, 1 миллиону 552 ҳазору 500 дона тухми мурғ ва 6185,1 тонна шир ба фурӯш рафт. 

Ҳолати мелиоративии 270 гектар замини корами обии хоҷагиҳои деҳқонӣ бинобар сабаби баландшавии оби зеризаминӣ ва шӯршавии таркиби хок беҳбудиро талаб мекард ва дар ҳамин росто аз ҷониби идораи беҳдошти замин ва обёрии ноҳия 38 километр шабакаҳои обёрӣ, 95 ҳазор метри мураббаъ ба дарозии 25 километр заҳбуру заҳкашҳо тоза карда шуданд, 21 иншооти гидротехникӣ, 26 таҷҳизоти обченкунӣ ва 8 дастгоҳи обкашӣ аз таъмир баромаданд. 

 

Муҳаммадзоиршо ШАРИФЗОДА,

Зокир ҲАСАН,

“Ҷумҳурият”