Муовини якуми раиси Бонки миллии Тоҷикистон Фирдавс Толибзода бо директори роҳбарикунандаи Дафтари Швейтсария оид ба ҳамкориҳои иқтисодӣ (SECO) Мартин Саладин ва директори SECO дар Ҷумҳурии Тоҷикистон Саломе Штайб мулоқоти корӣ анҷом дод.

 

Фирдавс Толибзода ба сатҳу сифати ҳамкории Бонки миллии Тоҷикистон ва SECO баҳои баланд дода, Мартин Саладин ва ҷониби Швейтсарияро бо вазъи макроиқтисодӣ ва низоми бонкии кишвар шинос намуд. 

Таъкид шуд, ки Бонки миллии Тоҷикистон дар самти таъмини суботи молиявӣ, тақвият бахшидани низоми бонкӣ, ҳимояи ҳуқуқҳои истеъмолкунандагони хизматрасониҳои молиявӣ  ва рушди низоми пардохт бо SECO равобити судмандро роҳандозӣ намуда, дар ин замина ҷиҳати рушди низоми бонкии кишвар аз кумакҳои техникӣ ва машваратии ниҳоди мазкур бархӯрдор гардидааст. 

 Фирдавс Толибзода изҳори эътимод намуд, ки минбаъд низ ҳамкориро дар самти тақвият бахшидани устувории низоми бонкӣ, рушди низоми пардохт ва ҳимояи ҳуқуқҳои истеъмолкунандагони хизматрасониҳои молиявӣ  идома хоҳанд дод.

Як нуқта боиси зикр аст, ки Бонки миллии Тоҷикистон дар ҳамкорӣ бо SECO ва Бонки ҷаҳонӣ “Стратегияи миллии фарогирии молиявӣ барои солҳои 2022 – 2026”-ро таҳия намуд, ки 1 июли соли 2022 бо қарори Ҳукумати Ҷумҳурии Тоҷикистон тасдиқ гардид. Бинобар ин, изҳори умед шуд, ки намояндагони SECO ҷиҳати дар амал татбиқ намудани Стратегияи мазкур талош хоҳанд кард. 

Мартин Саладин барои идомаи ҳамкории мутақобилан судманди ҷонибҳо дар самтҳои зикргардида ҳавасмандӣ зоҳир намуд.

Зимни муколама ҷараёни татбиқи кумакҳои техникии SECO ба Бонки миллии Тоҷикистон, аз ҷумла дар самти татбиқи лоиҳаи рушди идоракунии корпоративӣ, таҳияи заминаи меъёрии ҳуқуқии низоми пардохт, мавриди баррасӣ қарор гирифта, масъалаи расондани ёрии машваратию техникӣ дар самти таъсиси Академияи бонкӣ, дастгирии SECO дар роҳандозии  муносибатҳои муросилотии бонкҳои кишвар бо бонкҳои хориҷӣ, таҳияи барномаҳои нави SECO дар Ҷумҳурии Тоҷикистон ва дигар масъалаҳои барои ҳар ду ҷониб муҳим баррасӣ ёфтанд.

 

Муҳаммадзоиршо ШАРИФЗОДА, "Ҷумҳурият"