Чанде пеш ба ифтихори 31-умин солгарди Истиқлоли давлатӣ, Пешвои миллат муҳтарам Эмомалӣ Раҳмон ба беш аз 200 нафар олимону омӯзгорон, шоирону нависандагон, аҳли фарҳангу санъат, коргарону сохтмончиён, кишоварзону соҳибкорон барои дастовардҳои баланди меҳнатиашон мукофоту унвон ва ҷоизаҳои давлатӣ супурданд. 

Президенти мамлакат дар оғози маросим иброз доштанд, ки дар арафаи ин ҷашни фархунда бо мукофоту ҷоизаҳо қадр намудани намояндагони касбу кори гуногун, аз ҷумла аҳли зиё, хизматчиёни давлатӣ ва кормандони дигар соҳаҳо, нишони қадршиносии Ҳукумати мамлакат мебошад. 

Боис ба ёдоварист, ки дар ин миён, аз ҷумла  Ато Ҳамдам ва Гурез Сафар бо унвони Нависандаи халқии Тоҷикистон шарафёб гаштанд. Кормандони собиқи рӯзномаи “Ҷумҳурият” Ато Мирхоҷа барандаи Ҷоизаи давлатии Ҷумҳурии Тоҷикистон ба номи Абуабдуллоҳ Рӯдакӣ шуда, Карим Давлат унвони Корманди шоистаи Тоҷикистонро гирифт. Академик Кароматулло Олимов бо Ҷоизаи давлатии Ҷумҳурии Тоҷикистон ба номи Абуалӣ ибни Сино ва раиси Иттифоқи журналистони Тоҷикистон Зинатулло Исмоилзода ва фарҳангшиносу рӯзноманигори шинохта Ҷонибек Асрориён бо медали “Хизмати шоиста” мушарраф гардиданд. 

 

Комрон САФАР, “Ҷумҳурият”